MPSC-in group A & B tur mi 3,792 la tawh

Mizoram Public Service Commission (MPSC) thawktute chuan nimin khan Aijal Club-ah MPSC kum 34-na an lawm a; state sorkar hnathawk group A leh B direct recruitment-ah kum 34 chhungin MPSC-in mi 3,792 a la (recommend) tawh tih an tarlang.

MPSC din champha lawmnaah hian chairman R Lalramnghaka bakah, member dangte leh secretary ten thu an sawi a; din champha lawmna cake an zai a ni.

Tarlan danin, MPsC hi India Danpui Article 315 tlawhchhanin kum 1991-ah din niin, May 1, 1991 khan chairman hmasa ber SR Vala, IAS-in hna a zawm a, hei hi MPSC din ni-ah hman a ni. Kum 1991 aṭanga nimin thleng khan MPSC hian chairman 12 a nei tawh a, member 21 an awm tawh. Secretary 11 an awm tawh a, sanctioned post 86 a nei mek.

Kum 34 chhung hian MPSC hian direct recruitment hmangin Mizoram sorkar hnathawk group A leh B atan mi 3,792 a la (recommend) tawh a; sorkar hnathawk lai kaisanna atan departmental promotion committee (DPC) meeting vawi 4,578 neih a ni tawh. Departmental exam, limited competitive exam leh induction atan exam eng emaw zat buatsaih a nih tawh bakah, hna zawng laite tan online portal mpsconline.mizoram.gov.in siam a ni bawk.