Ronald Sapa vawiinah vui dawn

April 30, 2025 zinga thi Rajya Sabha MP hlui Ronald Sapa Tlau ruang chu nimin tlai khan an in thlenpui a ni a, vawiin chhun dar 12 hian vui a ni ang.

Ronald Sapa Tlau ruang hi Lengpui Airport-ah mi ṭhahnem takin an lo hmuak a, a pualin airport terminal pawnah inkhawm tawi buatsaih a ni. Inkhawmah hian Lengpui Airport chaplain Capt. N Vanlalringa'n a kaihruai a, MPCC treasurer Dr Lalmalsawma Nghaka'n MPCC hmingin pangpar a dah a, senior vice president Lalnunmawia Chuaungo-in thu a sawi.

Lalnunmawia Chuaungo chuan, Ronald Sapa chu Mizoram mipui aiawha Parliament-a kum 6 chhung ṭhu tawh leh Mizoram tan thil ropui tak tak ti tawh a nih thu a sawi a, "Kan party tan chuan chânna nasa tak a ni a, a hmun ruak hi hnawhkhah theih a ni dawn lo," a ti.