Lunglei ZPM-in lawmthu an sawi

ZPM Southern Hqrs, Lunglei chuan thuchhuah siamin, Mizoram sorkarin Aizawl-Thenzawl-Lunglei (ATL) road siamna atan cheng vbc 58.99 a ruahman belh chu lawmawm an tih thu an tarlang.

Lunglei ZPM chuan, ATL road siamna atana sum awm vbc 90.69 zinga vbc 44.89 chu pawh pên nia sawi a nih thu tarlangin, "CM Pu Lalduhoma’n kawng hi ṭha taka siam a tumna leh CRRI-in estimate siam se cheng vbc 100 chuang pawh a ṭul anga sanction zui leh tura ruahmanna a neih chu nghah zawh a nih tak loh avangin CM-in vbc 58.99 a rawn ruahman belh ta hi lawmawm kan ti tak zet a, pawh pên nia an sawi vbc 44.89 aia tam daih mai ruahman sak kan ni hi chhim mipui min duhsakzia chiang takin a tilang," an ti.

ATL Road siamna tura sum sanction chu PWD manual angin cheng vbc 104.88 a ni ta tih sawiin Lunglei ZPM chuan, "CM Pu Lalduhoma bakah kan chhim lam MLA-te leh kan party-in hma an lakna ropui kan ti a, kan chhuang tak zet," an tia; an chungah an lawm thu an tarlang.