Sawivunga'n hlawhtlingte a lawmpui

Minister C Lalsawi­vunga chuan nimin khan a pisaah a bial Aizawl South-I huam chhung mi, HSLC 2025-a top 10-a tlingte leh MPSC Combined Competitive Examination 2024-a hlawhtlingte lawmpuina hun a buatsaih a, lawmpui nan thuchei leh laptop a hlan.

C Lalsawivunga chuan, lawmpuina a hlante thinlung taka a lawmpui thu sawiin, "Kawng engkimah Pathian ring chunga hma lam pan turin ka sâwm che u a, in hlawhtlinna hi thinlung takin ka lawmpui che u... Rinawmna, dikna leh taimakna hi in nun laipuiah neih tlat u la, chu chuan malsawmna tam tak a keng a ni," a ti.

C Lalsawivunga chuan, thuawihna leh Pathian ṭihna chu nu leh pa chawimawina a ni tih hre reng turin a chah a; Isua hnen an thlenpui theih loh tur thilteah intibuai lo tur leh, an thiamna leh finnate Pathian ram zau nan leh ram tan hlan zel turin a chah bawk.

Minister-in lawmpui-na a hlante hi HSLC 2025-a top 10-a lang mi pathum leh MPSC Combined Competitive Examination 2024-a tling mi pahnih an ni.