KHAWTHLIR

Loan nuai 3,329 pek turin pawm

Mizoram Cooperative Apex Bank Ltd. Board of Directors chu nimin khan an pisaah an ṭhu a; mimal leh biak-in loan dilna cheng nuai 3,329 an pawm bakah, MCAB hmachhawpte an sawiho. MCAB hotute ṭhukhawm hian biak-in sakna loan dilna 74 pawmin, a vaiin cheng nuai 2,370 a ni a; mimal loan dilna 67 pawmin, a vaiin cheng nuai 959 a ni.

Kuhva rah man

Assam Rifles sipaite chuan May 1, Ningani khan dan loa lak luh kuhva rah ip 24, Ruantlang huam chhung ramhnuaia thuhrûk an man a, Champhaia Customs Preventive Force hnenah an hlan. Kuhva rah hi cheng nuai 13.44 mana chhût a ni.

Study centre hawng

SCERT director Caroline Zoramthangi chuan nimin khan Champhai DIET-ah NIELIT CCC Study Centre a hawng a, DIET Champhai Management System (DIET CMS) modile application a tlangzarh bawk. NIELIT Study Centre-ah hian bul ṭan nan computer 10 leh instructor pakhat a awm dawn a, July 2025-ah zirna ṭan tum a ni.

Tlan phal loh hun

Lirthei tam vanglaia Zarkawt leh Dawrpui Vengthar inkara lirthei tâwt lutuk tihziaawm nan leh kea kalte himna atan nimin aṭang khan Dawrpui Vengthar LC Chawlhbuk aṭangin Zarkawt lamah zing dar 8:30 - 10:00 chhung two wheeler tlan chhoh phal a ni lo tih, Traffic SP Stephen Lalrinawma'n a tarlang. Thupek hian Dawrpui Vengthar LC Chawlhbuk aṭanga chhak lama chengte erawh a huam lo.

Ngaizelah tlân khap

Ngaizel khamah lung tla a awm ṭhin avang leh, ruah a tlak avangin Aizawl district magistrate Lalhriatpuia chuan zan lamah Ngaizel kawng pheia lirthei tlan phal a nih loh thu a puang. Magistrate tarlan danin, zan dar 7 leh zing dar 5:30 inkarah LMV chin hnuai tlan phal a ni lo a, MMV leh HMV tan zan 10 leh zing dar 5:30 inkarah tlan phal a ni lo. Hriattirna hi hriattirna thar chhuah leh hma zawng hman tur a ni a; kea kal tlang turte pawh fimkhur tura chah an ni.