Rinna kawngah Mizote'n hmasawn kan mamawh - Minister Lalthansanga

Minister Lalthansanga chuan nimin khan a bial chhung, Neihbawi, Sihphirah, Discipleship Training Institute 77th Batch Graduation Day a hmanpui a; rinna kawngah Mizote'n hmasawn an mamawh thu leh rinnaah ringlo mite entawn tlaka nun a ṭul thu a sawi.

Lalthansanga chuan, ZPM pian dan chu ṭawngṭai rah chhuah a nih thu sawiin, "Ṭawngṭainaa phuar khawm kan ni. Rinna kawngah Mizote'n hmasawn kan ngai hle a, sakhaw dangte inrêlbâwl dan en hian entawn tur kan ngah zawk hlein a lang. Sakhaw inzirtirna lamah hmasawn kan mamawh a... Ringlo mite tan pawh rinna kawnga nun entawn tlak kan neih a ṭul hle a ni," a ti.

DTI aṭanga zir chhuakte chu Pathian kaihhruaina chang zel turin Lalthansanga chuan duhsakna a hlan a; Mizoram chu Pathian hriat ram a nih zel theih nan ṭawngṭainaah ram hruaitute hre reng turin a chah bawk.