Bawrhsap hoin kawng siam endik

Kolasib district bawrhsap Robert C Lalhmangaiha hoin nimin khan MJA, Kolasib district leh YMA Sub-Hqrs hruaitute'n Bilkhawthlir leh North Chawnpui inkar kawng thawm ṭhat hna thawh mek an tlawh. Bawrhsap chuan, kawng siamtu contractor-te chu an hnathawhna tibuai thei tur thilte sorkarah thlen hreh lo turin a hrilh.

Robert C Lalhmangaiha chuan, Bilkhawthlir leh North Chawnpui inkar kawng chu Bûkpui tlangdung, Saipum leh Saiphai thlenga hman ṭangkai a nih thu a sawi a, "Kumin kum tawp lamah Sakawrdaia YMA General Conference awm tur atan inkalpawhna kawng pawimawh tak pakhat a ni dawn a, a hma thei ang bera kawng ṭha neih a pawimawh," a ti.

Kolasib DC leh amah ṭawiawmtute hian Saihapui-V Border Outpost an tlawh bawk a, SDPO Lalnunpuia leh police duty-te nen an inkâwm. Bawrhsap chuan duty-te chu an hnate rim taka an thawk zel tur leh ramri buai thil thuah an duty-na hmun chu Mizoram luhka a nih avangin thâ thlah lo turin a chah.

Bilkhawthlir - North Chawnpui inkar kawng hi PMGSY 2.0 hnuaiah cheng nuai 2421.49 senga siam tura ruahman a ni a, km. 17.6-a thui leh metre 3-a zau a ni. Siam zawh tawh ni mah se, kawng chhe lai a awm nual avangin contractor-te'n defect liability period (kum 5) a zawh hma chuan kawng an enkawl rih dawn a ni.