Agriculture Infrastructure Fund zirho

Agriculture & Farmers Welfare minister PC Vanlalruata hoin nimin khan Aijal Club-ah 'Regional Conclave on Agriculture Infrastructure Fund (AIF)' buatsaih a ni. AIF hi March 2026 thleng dil theih a ni a, India ram pumah Sikkim leh Mizoram chiahin an la hmang ṭangkai lo tih tarlan a ni.

Ṭhutkhawm hi Agriculture director R Lalzirliana'n a kaihruai a; minister PC Vanlalruata bakah Ministry of Agriculture & Farmers’ Welfare joint secretary Samuel Praveen Kumar, Agriculture secretary Ramdinliani, adviser to CM (handholding) Dr KC Lalmalsawmzauva ten thu an sawi. Agriculture, Horticulture, AH&Vety, Land Resources Soil & Water Conservation, Fisheries leh Sericulture department hotu te, kut hnathawktu te, tlawmngai pawl leh bank lam aiawhte an tel.

PC Vanlalruata chuan, Agriculture Infrastructure Fund (AIF) chu sum dah sa, la hman ṭangkai loh, remchang si a nih thu a sawi a, "Scheme hian agriculture leh a kaihhnawih lama hma latute sum lak luh nasa takin a tipung thei dawn a ni," a ti.

Samuel Praveen Kumar chuan, AIF-ah Mizoram tan kawng hawn a nih thu a sawi a, "AIF hi India rama agriculture infrastructure hmasawn nana financial support a ni a, financing facility a nih angin interest tlemtêin loan pek theih a ni. AIF hi nakkum March thleng dil theih a ni a, India ramah Sikkim leh Mizoram chiahin an la hmang ṭangkai lo," a ti a; AIF chu hmang ṭangkai turin Mizoram mipui a sawm.

He hunah hian AIF chungchang leh Mizorama hmalak theih dan kawng hrang hrangte sawiho a ni.