Domestic cylinder hman phal lohna tarlang

Lunglei district civil supply officer (DCSO) Lalremruata Sailo chuan hriattirna tichhuakin, hotel, restaurant, zirna-in, biak-in leh vantlang ruai buatsaihnaah LPG (gas) domestic cylinder hman khap a nih thu leh commercial cylinder chauh hman phal a nih thu a tarlang.

Lalremruata Sailo chuan, tunlai hian Mizoram hmun hrang hrangah LPG commercial cylinder hmanna tur hotel, restaurant, zirna-in, biak-in leh vantlang ruai buatsaihna hmunahte in chhung khawsaknaa hman tura duan domestic cylinder hmang an tam hle tih hriat a nih thu a tarlang a, "Liquefied Petroleum Gas (Regulation of Supply and Distribution) Order 2000 leh Marketing Discipline Guidelines, 2018-in 'black marketing/diversion of Domestic LPG Cylinders' a tih zinga mi a nih angin dan kalh a ni," a ti.

Hotel, restaurant, zirna-in, biak-in leh vantlang ruai buatsaihnaahte danin a phût angin LPG commercial cylinder chauh hmang turin Lunglei mipui a chah a; hun remchang hmasa berah Lungleia FCSCA leh Legal Metrology ten an hma an lak dawn thu a tarlang bawk.