Hauruangin LMC aṭanga chhuah an duh

Hauruang Local Council chuan May 3, Inrinni khan Lunglei Municipal Council (LMC) aṭanga chhuah duh leh duh loh chungchangah an khaw mipui inràwnkhawmna (gram sabha) an buatsaih a; a kal zawngin LMC aṭanga chhuah an duh.

Hauruang LC chairman Zothanmawia Sailo chuan, Mizoram puma VC leh LC inthlan zawh hnuah NGO Coordination huaihawtin meeting an neih tawh thu a sawi a, "Hemi ṭum hian LMC aṭanga tâl chhuah dan ngaihtuaha hmalak ni se tih a ni. Vawiina kan inkoh khawm hi meeting hmasa thurel bawhzuina a ni," a ti.

Inrawnkhawmnaa kalte chuan LMC aṭanga chhuah an duh tih hming ziakin an tichiang nghal a ni. An ruahman dan chuan, LMC aṭanga chhuah an duh thu thlen turin Hauruang khawtlang hruaitute'n tun kar hian Chief Minister emaw, UDPA Minister emaw hmuh an tum.

Hetih lai hian, Pukpui, Lungpuizawl, Zobawk North leh Zobawk South te pawhin LMC aṭanga chhuah theih dan a awm chuan chhuah an duh thu an lo sawi tawh bawk.

LMC chhunga khua/veng hrang hrangte'n LMC aṭanga chhuah an duh chhan ber chu - LMC a din hnua pawisa chawi chi hrang hrang leh chawi tur la awmte mipuiin an zawh loh vang leh, MGNREGS a tàwp tak vanga mi tam takin harsatna an tawh phah vang a ni.