Mizoramah kumin 2025 chhungin ASF vangin vawk 4,598 thi tawh

Vawk pùl hri, African Swine Fever (ASF) vangin kuminah nimin thleng khan Mizorama district paliah vawk 3,493 a thi tawh a, vawk 1,105 suat tawh a ni a, a vaiin 4,598 a ni.

Animal Husbandry & Veterinary (AH&Vety) department-in report a dawn chinah kumin March thla laihâwl vel aṭangin ASF vanga vawk thi a awm ṭan a; nimin May 4 thleng khan Lunglei, Siaha, Lawngtlai leh Mamit district-a khua/veng 49 chu ASF hri lênna hmun (infected area)-ah puan a ni tawh.

Siaha district-ah ASF lênna, vawk thi leh suat tam berin, nimin thleng khan khua/veng 26-ah ASF vanga vawk thi 2,010 leh hri darh zel tur venna atana suat 696 a awm tawh a; a vaiin vawk 2,706 a tling.

Mizoramah kum 2021-a ASF a lên tirh aṭanga nimin thleng khan ASF vanga vawk thi leh suat zawng zawng chu 1,19,934 a ni.