KHAWTHLIR

Pawl 4-in thisen pe

May 3, Inrinni khan pawl paliin thisen unit 161 an pe. YMA, Aibawk Branch chuan Civil Hospital Aizawl tan unit 55 pein, petute mipa 47 leh hmeichhia pariat an ni a; KṬP, Zemabawk Branch-in an din champha vawi 69-na pualin Synod Hospital tan unit 46 an pe a, petute mipa 42 leh hmeichhia pali an ni. ṬKP, Tuiphai Pastor Bialin Lunglei Civil Hospital tan unit 41 an pe a, petute mipa 34 leh hmeichhia pasarih an ni a; KṬP, Serchhip Field Veng Branch-in Serchhip District Hospital blood bank-ah unit 19 pein, petute hmeichhia 11 leh mipa pariat an ni.

BMP din champha

Nimin May 4 kha Baptist Mipa Pawl (BMP) din champha vawi 45-na a ni a, BMP unit hrang hrangte'n an hmang. Kumina BMP din champhaa thupui chu 'Thlen chin aṭanga hmasawn' tih a ni.

Kawlphethain a man vangin thi

May 3, Inrinni khan Lalrammuana (18) s/o T Lalrinawma, Falkland Veng chu hna a thawhnaah kawlphethain a man avangin a thi. Lalramuanna hi a ṭhianpa nen an vengah hna an thawk a, kawlphetha hrui chinfel a tumnaah kawlphethain a man a, damdawi-in panpui a nih laiin a thi a ni.

Lungphùm phúm

Lawngtlai district bawrhsap Cheemala Siva Gopal Reddy chuan May 3, Inrinni khan IRCON corporate social responsibility (CSR) sum hmanga sak tur Zochachhuah Health Sub-Centre lungphùm a phúm. DC hian Zochachhuah Primary School tlawh nghalin, an dinhmun a enfiah a; harsatna an neihteah district administration-in theihtawp a chhuahpui tur thu a sawi.

Lawmman lawm

Siaha District Hospital Siaha chuan kum 2023-24 leh 2024-25 chhunga KAYAKALP intihsiaknaa lawmman pahnihna an dawn leh Eco Friendly 2024-25 pakhatna leh NQAS certification an hmuhte May 2, 2025 khan an lawm. Lawmna inkhawm hi Medical Superintendent hall-ah buatsaih a ni a, Mara Autonomous District Council-a deputy chief executive member S Lalremthanga'n a hmanpui a ni.

MLA-in enfiah

Aizawl East-II bialtu MLA B Lalchhanzova, minister of state chuan May 3, Inrinni khan a bial chhung­a Saron Veng health sub-centre building-a hmalak ngai leh anganwadi centre-II chei ṭhat mek a enfiah. B Lalchhanzova hi Saron Veng LC House-ah Saron Veng mipuite'n an dawr theih turin a ṭhu a, pawl leh mimal hrang hrangin an duh leh mamawhte an thlen a; an thu thlente chu a theih ang anga tihhlawhtlin a tum thu Minister chuan a sawi.