AR ram ngaihtuahtute ṭhukhawm; AR-ah nuai 500 vel pek a ngai dawn

Aizawl khawpui lailia Assam Rifles chhuahsan hmun hman zui dan tur ngaihtuah tura sorkarin a din, Assam Rifles Ram Advisory Committee chuan, sipai chhuahsan ram chu mimal, pawl, party leh kohhran kuta lut lo turin thutlukna an siam. AR chuahsan rama in dingte khul nan sorkarin cheng nuai 500 vel a pek a ngai dawn.

Assam Rifles Ram Advisory Committee hi nimin khan chief minister Lalduhoma kaihhruaiin CMO conference hall-ah an ṭhu a; GAD secretary Vanlaldina Fanai-in AR ram chhuahsan tâka hmalak tawh dante a sawifiah.

Advisory Committee hian sipai chhuahsan ramte chu mimal, pawl, party leh kohhran kutah lut lo se tiin lungrual takin thu an titlu a; AR ram chhunga ram nei - mimal, pawl leh kohhran te chu an ram pass-te sorkara hlan lêt vek tura ngen ni se, ram neitu ṭhenkhat court-a sorkar khing mekte pawh an thubuaite hnûk kîr tura ngen ni se an ti.

GAD Secretary chuan, AR hmuna in dingte khulna (depreciated cost of buildings) atan cheng nuai 500 vel pek a ngai dawna a lan thu a tarlang. Aizawl bawrhsap Lalhriatpuia pawhin, tun hnaia Zokhawsang leh Lammual chhehvel joint verification report-te a pe bawk.

Ṭhutkhawmah hian UDPA department hotute'n master plan an duan thlirho a ni a, a ṭul anga thlirho leh atan dah a ni.

Assam Rifles Ram Advisory Committee hi Mizoram (Restriction on use of Transferred Land) Act, 2002 Section 6 hnuaiah din a ni. Chief Minister chu chairman niin, Home Minister chu vice chairman a ni a, member zingah sorkar official 16 an tel a, sawm bikte leh pawl hrang hrang hruaitu 14 an tel bawk.