Scooty-a AMC JE sut luih dem

Aizawl Municipal Corporation Employees' Association (AMCEA) chuan thuchhuah siamin, an thawhpui AMC-a junior engineer Robert Lalremruata chu April 25, 2025 zana AMC Bazar (AMC Multi Complex), Tuikual South-a a duty laiin scooter (scooty)-in sut luih a nih thu an tarlang.

AMCEA chuan, Robert Lalremruata chu Benjamin C Lalruatsanga s/o C Lalpartlana, Tuikual South chuan scooty-in a sú a, CCTV footage aṭangin tihpalh ni loin, sut luih ngei nia a lan thu an tarlang a; Robert Lalremruata chu Civil Hospital, Aizawl pan pui nghal niin, x-ray leh CT scan-te tih a nih thu an sawi.

An thawhpui official duty lai sut luih a ni chu pawi an tih thu tarlangin AMCEA chuan, "Pawi khawihtu kan dem tak zet a, tun hnuah hetiang thil hi thleng tawh lo se kan duh," an ti.