KHAWTHLIR

Petrol/diesel dan loa zawrh khap

Aizawl district magistrate Lalhriatpuia chuan thupek chhuahin, Aizawl district-ah phalna nei loa petrol leh diesel zawrh khap a nih thu a puang. Thupek zâwm lote chu an petrol/diesel mansak an nih dawn bakah, BNS 2023 Section 223 hmanga hrem theih an nih thu a tarlang.

Lawmpuina hlan

Champhai bawrhsap Mohammad Aaquib chuan nimin khan a pisaah Champhai aṭanga MPSC Combined Competitive Examination hnuhnung bera MCS-a tling Lalchhuanawma Ralte, Champhai IPRO ni mek leh MPS-a tling B Lalṭhakima, Champhai Zion Veng te lawmpuina thilpek a hlan. DC chuan, Champhai district-in zirnaa hma a sawn theih nan theihtawp chhuah a tum thu sawiin, "Min ráwn duh an awm chuan engtik lai pawhin puih ka inhuam," a ti.

HSSLC result

MBSE chuan vawiin chhun dar 12 hian Higher Secondary School Leaving Certificate Examination 2025 result a tichhuak dawn. Result hi MBSE Office, Chaltlang leh MBSE Regional Office, Lungleiah te, website www.mbse.edu.in leh www.mbseonline.com ahte en theih a ni ang.

Hmalakna sawiho

Saitual DC Dr Lalngura Tlau hoin nimin khan DC conference hall-ah One Stop Centre (OSC), Women Helpline (WHL-181) leh Child Helpline (CHL-1098) kaihhnawiha Saitual district-a hmalaknate sorkar hotu te, home enkawltute leh MHIP hruaitute nen sawiho a ni. OSC-te hian VC, YMA leh MHIP-te nen ṭanghoin awareness an kalpui a ni.

GRPA sawiho

Kolasib District Level Government Land Authority chu nimin khan bawrhsap Robert C Lalhmangaiha hoin an ṭhukhawm a; Mizoram Government Land Pooling and Management Scheme, 2018-in district khawpuia sorkar hnathawkte tana luah theih tur general pool residential accommodation (GPRA) siam tur a tih chungchangah zirchianna fel zawk leh spot verification neih belh a ṭul thu GAD-ah thlen an rel.