CM leh FA Airlines hotu inkâwm

Chief minister Lalduhoma chu nimin khan a pisaah FA Airlines managing director Prof. Fauzia AA Arshi nen an inkâwm a; FA Airlines-in thawhpui atana Mizoram sorkar a sàwmnaah Chief Minister chuan cargo lama thawhhona neih ṭha a tih thu a sawi.

CM Lalduhoma hnenah hian Fauzia AA Arshi chuan Mizoram sorkar thawhpui tura rawtna an neihte an thlen a; Chief Minister chuan cargo lama thawhhona neih ṭha a tih thu lo hrilhin, "In rawtnate hi chipchiar taka kan hriat hmasak a ngai a, ziakin kimchang takin rawn thehluh u la a ṭha ang," a ti.

Prof. Fauzia Arshi chuan, "Khualzinte'n awlsam zawka Mizoram an tlawh theih nan te, zau zawka Mizoram thar organic thlai zawrh chhuah nan te, a ṭul ang zelin Aizawl khawpui zauh hna emaw, khawpui thar din kawngah pawh Mizoram sorkar nena thawh dunna neih kan duh. In tan sum leh pai senna tur thil a awm vak lo ang," a ti a; sorkar thawhpui chu an duh ber a nih thu leh sum an neih thu a sawi.

Chief Minister hi CM secretary Vanlaldina Fanai-in a ṭawiawm a; FA Airlines hotute hian nimin vek khan Mizoram sorkar thawhpui tura rawtna an neihte Vanlaldina Fanai hnenah an thehlut nghal a ni.