Minister pahnihin bazar tur an enfiah

Nimin khan Aizawl North-III bialtu MLA K Sapdanga, minister leh Horticulture minister C Lalsawivunga chuan Hunthar Venga Horticulture department building chu Hunthar Veng chawhmeh bazar atan hman theih a nih leh nih loh an enfiah.

Aizawl North-III Bialtu MLA chuan, Hunthar Vengin bazar mumal an neih loh avang leh Horticulture building chu a awmna hmun a lo remchan thu a sawi a, "Bazar atan hman mai thei niin kan hria a, khawtlang hruaitute'n ka bulah an sawi a, chu chu Horticulture Minister bulah ka bawhzui a ni," a ti.

Horticulture Minister-in phûr taka a lo dawngsawng chu lawmawm a tih thu sawiin K Sapdanga chuan, "Thlai thar zawrhna hmun ṭha tak atana kan awh em em a changtu minister-in ruahmanna min siamsak thei tur hi Bialtu MLA ka nih angin thinlung takin lawmthu ka sawi," a ti a; a hmunhma chei ngai ang ang pawh a rang lama bawhzui zel an tum dawn thu a sawi.

C Lalsawivunga chuan, Aizawl North-III chu bialtu MLA chak tak an neih avanga an vanneih thu sawiin, "Bazar hmun tur thiam taka min rawn dil hi Horticulture subject nena thil inmil tak a nih avangin kan ui ngam lo a, a hmunah kan han en a, kawngpui hnuai chiah floor hi a remchang thei turah ka ngai. Kan department lam nen ruahmanna lo siam zel ni se, Hunthar khawtlangin he hmun hi ṭangkai taka bazar atan in hman ngei ka duh," a ti.

Horticulture Minister chuan, a rang thei ang bera bazar atana hman a nih theihna tura ruahman ṭha a tih thu sawiin, Horticulture Director hoa ruahmanna siam turin Hunthar Veng khawtlang hruaitute a chah a ni.