Centre of Excellence for Flowers dinna tura rawtna siam endik a ni

Netherland aṭanga rawn kal Ton Bakker, Indo-Dutch Centre of Excellence for Flowers PUM expert chuan Horticulture department-in Ṭhiak khuaa Centre of Excellence for Flowers dinna tura rawtna a siam a endik a, Mizorama pangpar enkawlna hmunte a tlawh.

Ton Bakker hi Horticulture director CH Lalmuanpuia kaihhruaiin May 2, 2025 khan Horticulture department hotute leh Mizorama pangpar khawitu pawl hruaitute nen an inkâwm a; Horticulture department hotu te, Zo-Anthurium Growers Cooperative Society, Mizoram Florist Association, Mizoram Bonsai Association leh Orchid Society of Mizoram hruaitute an tel a, rawtna leh ruahmannate sawiho a ni.

Horticulture department leh pawl hrang hrang hmalakna fakawm a tih thu sawiin Ton Bakker chuan, "Hmasawn theihna tur tam tak a awm a, Mizoramin hmabak êng tak a nei a ni," a ti.

Ton Bakker hian Horticulture department-in Centre of Excellence for Flowers atana hmunhma an rawtte a endik a; Mizorama pangpar chingtu pawl hrang hrangte hmalakna a hmunah a enpui bakah, Aijal Club Park-a Mizoram Florist Association buatsaih Florists Fair a tlawh bawk.