MPCB phalna nei loa industry din Aizawl khawpui chhungah 292 awm

Mizoram Pollution Control Board (MPCB)-in a chhin-chhiah danin, Mizoram pumah industry 765 a awm mek a, Aizawlah phalna nei loa din industry 292 awmin, MPCB-in a pawmpui theih loh damdawi-in pakhat a awm.

MPCB hotute'n zawhna chhanga an sawi danin, Mizorama industry 765 zingah a lian deuh hoin boruak bawlhhlawh venna lam an ngaihsak ṭha thawkhat a, industry laihâwl leh a tênau deuhte'n an ngaihsak tâwk lo hle thung. Aizawlah phalna nei loa din industry 292 awmin, industry pakhat chu insawifiah turin an hriattir mek a ni.

MPCB hian a din tirh aṭangin The Air (Prevention and Control of Pollution) Act 1974, The Water (Prevention and Control of Pollution) Act 1974, Environment Protection Act 1986 leh dân dang tlawhchhanin industry leh damdawi-inte chu mihring hriselna khawih pawi thei an nih leh nih lohte an enfiah ṭhin.

Central Pollution Control Board-in dân a neihte chu tun hnaiah ennawn a ni a, 'Revised Classification of Industrial Sector 2016' tih niin, chutah chuan industry, damdawi-in leh hmun
ṭhenkhat chu bawlhhlawh an siam chhuah dante ṭhen hran a ni.

Boruak bawlhhlawh siam chhuak nasa ber 60 chin chunglam chu 'Red' an ti a, 41-59 chu 'Orange', 21-40 chu 'Green' leh 1-20 chu 'White' tiin
ṭhen a ni.

India ramah industry chi hrang 244 a awm a, chu'nga awm lote chu state thuneihna hnuaiah dah niin, state sorkara Pollution Control Board-in ṭul a tihte chu a khung tel thei. Aizawl khaw páwn lama industry zingah MPCB-in dân anga licence a pek an awm mang lo a; The Air (Prevention and Control of Pollution) Act, The Water (Prevention and Control of Pollution) Act hmanga phalna lak hmasak ngaite la an awm mang lo.

MPCB hian Aizawl chu ṭhuang thumah ṭhenin industry lian leh a tênau thlengin an endik ṭhin a; veng 34 an tuam tawhah industry 337 hmu tawhin, chu'ng zinga 292 chuan phalna an nei lo a, phalna nei 45 an awm tih an hmuchhuak. Veng dangte pawh an la endik zel dawn.

Aizawl an endiknaah hian phalna nei tih an hriat chian sa, mobile phone tower 40 vel te, industry lian zual ISPAT, OIL, ONGC bakah sorkar leh mimal damdawi-inte chu an endik nawn lo. Mizo Carbon erawhin boruak bawlhhlawh venna lam an siam ṭhat viau laiin, MPCB lamin a hmuna an endik chaágin an khawl an hman ngai loh avangin an dil nawnna chu pek an ni tawh lo.

Sorkar leh mimal damdawi-inte chu dânin a phut angin an bawlh-hlawh paihna tur bik leh an bawlhhlawh thûk taka phum ngai bikte phumna tur thlenga an neih a ngaih thu te, a bikin Aizawla mimal damdawiinte chuan bawlhhlawh sawngbawlna lamah dânin a phut angte an ngaih pawimawh deuh vek laiin, zawm ṭha tawk lo an awm avangin damdawiin pakhat chu certificate dil tharna an la pawmsak thei lo. Hetianga dân zawm ṭha lo an awm avang hian Industry pakhat pawh insawifiah tura tih an tum mek bawk.

MPCB hotute chuan, dân zâwm lote chu hrem theih an ni tih sawiin, "Environment Protection Act 1986 hnuaiah industry hi khârtir theih a ni. Pawisa chawitir theih an ni a, man theih an ni a, power supply leh tui connection tihtawpsak theih an ni," an ti. Hrem theihna dân ṭha tak tak nei mah se, hrem an la neih loh thu sawiin, insawifiah tura an tih phawt ṭhin thu an sawi.