AMC hotute'n Aizawl Press Club an tlawh

Aizawl Municipal Corporation (AMC)-a sorkarna chelhtu, MNF Legislature Party member-te chuan Inrinni khan Aizawl Press Club an tlawh a, MJA hruaitute'n lo dawngsawngin, AMC aṭanga MJA Public Library-cum-Recreation building sak ṭhat dan tur an enho.

AMC hotute hi deputy mayor Lalringliana hoin Aizawl Press Club-ah an kal a, MJA hruaitute nen hmalakho dan tur an sawiho nghal.

Lalringliana chuan, AMC chu sum leh páiah kalphung mumal zawk an zawh ṭan thu sawiin, constitutional body dang, autonomous district council-te sum dawn dan angin state-in sum a lak luh aṭangin an sum tur hmuh a ni tawh dawn tih a sawi.

AMC Deputy Mayor chuan, MJA Library building tur chu an ngaih pawimawh thu a sawi rualin, "AMC sum hman tur reng reng estimate-te siama a hmuna kan chhûtpui vek hnuah, hna leh sum pek chhuah chauh a ni ṭhin. Assets kan siam loh chuan a tawpa tuartu chu mipuite tho an nih avangin asset siam kan tum a ni," a ti.

Lalringliana sawi danin, tuna AMC budget cheng vbc. 31 zinga vbc. 20 chu Central aṭanga sum hmuh a ni a, cheng vbc. 10 chu AMC-in a thawh chhuah ve tur a ni. Lalrinngliana chuan, "State sawrkar nen inhnerem taka kal a, mipui tan theihtawp chhuah tlan hi kan duh ber a ni," a ti.

Aizawl Press Club tlawhtu AMC legislature member-te hi Lalringliana bakah, Lalhmingmawia, K Romawia, B Lalawm-puii, R Thanglura, H Zonunsanga leh C Lal-thansanga te an ni.