Aizawlah fire hydrant vuah mek a ni

Public Health Engineering (PHE) department chuan kumin July thla vel aṭanga ruahmanna an lo siam tawh angin, kângmei chhuah thulha rang zawka ṭhelh a nih theih nan tunlai hian Aizawla veng hrang hrangah tui lakna tur fire hydrant an vuah mek.

PHE department hotute'n Vanglaini palai zawhna chhánga an sawi danin, tuna fire hydrant an vuah mek hi kang-
ṭhelh motor-in tui a chawina tur a ni a, Aizawl khawpui kawngpui dunga hmun 40-ah vuah tur a ni. 30 chuang vuah tawhin, tun karah vuah zawh an inbeisei.

Aizawla local council 83 chhunga kâng ṭhelh motor kal theih lohna hmunah pawh kângmei chhuakte ṭhelh zung zung a nih theih nan hmun 400-ah kâng ṭhelhna tui pipe (hose coil) chuktuahna tur point 400 vuah a ni dawn bawk.

Hose coil point erawh hi chu Jalandhar aṭangin rawn thawn tawh mah se, Aizawl a la thlen loh avangin vuah a la ni lo a; tun karah a rawn thlen hman beisei a ni.

Local council 83-te'n an veng ṭheuhah kâng ṭhelhna tui pipe vuahna tur point an ruahman a, chu'ngah chuan PHE lamin hose coil an vuah ang. Veng hrang hrangah point a awm dawn a, point 10 chuang awmna vengte pawh a awm ang.Aizawl hmar lam veng 40-ah point 200 leh Aizawl chhim lam veng 38-ah point 200 vuah a ni ang.

PHE minister Zodintluanga chuan, Aizawl khawpui ṭhang zelah mihring, lirthei leh in leh lote a pung nasa tih sawiin, "Kângmei a chhuah chángin kang ṭhelh motor kal zung zung a harsa a, PHE department chuan harsatna sutkian dan tur a ngaihtuah a, ruahmanna a siam ta a ni," a ti a; Aizawlah fire hydrant pathum/pali chauh a awm avangin harsatna a tam a, in kâng ṭhelh hman loh a tam phah tih a sawi.

Aizawla LC-te chu kâng ṭhelhna pipe hlûm (hose pipe coil) panga ṭheuh pek an ni dawn a, hose pipe coil pakhat metre 30 zela sei a ni. Fire hydrant vuah nan hian cheng nuai 109 ruahman a ni.