KHAWTHLIR

Thisen pe

Inrinni khan pawl pangngain blood donation camp an huaihawt. Kahrawt branch KṬP an diamond jubilee pualin mipa 24 leh hmeichhia 24-in Champhai District Hospital-ah thisen unit 48 an pe a; Ramhlun Vengchhak branch KṬP-in Synod Hospital tan unit 31 an pe. Aizawl Civil Hospital tan Venghnuai Branch KṬP-in an diamond jubilee lawm nan unit 38, Dinthar Venga Evangelical Baptist Convention Church ṭhalai, Baptist Youth Fellowship-in an din champha pualin unit 38 leh, Christ the King Cathedral kohhranin Year of Mercy pualin unit 22 an pe bawk.

BCM inkhawmpui

Baptist Church of Mizoram chuan October 7-9, 2016 chhung khan pastor bial hrang hrangah bial khawmpui an hmang. Inkhawmpuiah hian Inrinni khan rorel inkhawm an nei a, nimin khan nilengin vantlang Pathian biak inkhawm an hmang a ni.

LAD inkhawmpui

UPC (North East India) North Mizoram district chhunga pastor bial 28-a Ladies Auxiliary Department (LAD)-te chuan October 7-9, 2016 chhung khan Tuikhuahtlanga an kohhran headquarters biak inah conference an hmang. Inkhawmpuiah hian C Lalthangpuii kaihruaiin rorel inkhawm neih a ni a, pastor bial 28 aṭangin palai 550 chuang an kal a ni.

Lok Adalat

Kolasib District Lok Adalat chu Inrinni khan District Court-ah an ṭhukhawm a, thubuai 46 an ngaihtuah zingah pariat an chingfel a, leiba ṭhinna aṭangin Rs. 42,500 an hmu let. Kolasib district-ah hian thubuai a tam deuh ṭhin avangin Lok Adalat hi bench hniha ṭhut ṭhin a ni.

Ganja man

Excise & Narcotics department-a Anti-Narcotics Squad chuan October 8, 2016 zing 6:30 khan Rangvamual Mel 3-ah ganja kg. 10 leh a neitua puh mi pahnih - Vungliankapa (48) s/o Kamdala (L) leh Chingneihnovi (38) d/o Lamliana, Hrianghmun, Champhai district nia inchhalte an man. NDPS Act 1985 tlawhchhanin thubuai siamsak an ni.