J Thankima College zirlaite an pungkhawm

J Thankima College zir-laite chu Inrinni chhun khan Bawngkawn Brigade rama an college hmun atana sorkarin ram a pekah an pungkhawm a; sorkarin ram a pek chhunga mi pakhat, ram neia insawiin a ram a hralh nia sawi an duh lohzia an lantir.

J Thankima College zirlaite hi Greenwood Hospital bul, Brigade Field panna pêngah innghak khawmin, kein an college hmun an pan a; an college hmun atana sorkarin ram a pek chu dan ang thlapa pek, land lease pawh awm vek a nih thu te, an college ram chhunga mimal ram nei nia insawi chu cancel sak an phût thute an tlangaupui a ni.

Zirlaite chuan resolution an pass a; resolution-ah chuan an college ram chhunga invalid pass neite cancel nghal an phût thu te, land lease an neih tawhna hmuna ram leitute leh hralh tumte chu zirlaite an thil tih sût leh tura an phût thu te, invalid pass neitute an dem thu leh an thil tih chu zirlaite hmuhsitnaa an ngaih thu te, pass neite'n an ram nia an sawi chu tuma'n lo leisak se an duh thu leh, an dikna leh chanvo humhalh tura theihtawp an chhuah tur thute an tarlang.

J Thankima College Students' Union vice president KL Nun^-chama chuan, an college ram chu sorkara dan ang thlapa an dil leh sorkarin a pek a nih thu a sawi a; an college ram a nih avangin sorkarah pawh chhiah chi hrang hrang pawh cheng nuai 8 chuang an chawi tawh niin a sawi bawk.