Khauh zawka vaihlo khuahkhirh turin Gauhati High Court-in Mizoram sorkar hriattir

Gauhati High Court, Aizawl Bench chuan public interest litigation (PIL) an dawnah thutlukna siamin, Mizoram sorkar chu vaihlo khuahkhirh kawngah thupek a chhuahte khauh zawka kengkawh turin a hriattir.

Pawl pakhat, Barnnady Gramya Unnayan Samity (BGUS) chuan kum 2013 khan Gauhati High Court-ah PIL thehlutin, vaihloin Mizo mipuite hriselna dinhmun a tihchhiat thu leh cancer vei an tam thu a tarlang a, Mizorama vaihlo khap an duh thu an thlen. Court chuan tun hnai khan thutlukna siamin, vaihlo aṭanga thil siam chhuahte zawrh chu khap loin, khauh zawka khuahkhirh turin sorkar a hriattir a ni.

BGUS-te aiawha ding ukil chuan, Mizoram Cigarettes and Other Tobacco Products (Prohibition of Adverstisment and Regulations of Trade and Commerce, Production, Supply and Distribution) (COPTA, 2003) chu kum tak kalpui tawh ni mah se, a siam chhuah leh a zawrh lamah Mizoram sorkarin tih tur tam tak a neih thu a tarlang.

BGUS-te ukil chuan, vaihlo aṭanga thil siam chhuah avangin mi tam tak hriselna dinhmun a
ṭhat loh phah nia sawiin, "Vaihlo kaihhnawih natna enkawlna atan sum tam tak sen a ni. Vaihlo
aṭanga thil siam chhuahte tirêm turin Mizoram sorkarin hma an la tâwk lo a, sorkar mawhphurhna chu vaihlo khap a, mipuite hriselna dinhmun siamṭhat a ni," a ti.

Sorkar ukil Aldrin Lallawmzuala chuan, COPTA dan hnuaiah Anti Tobacco Squad din a nih thu te, squad chuan dan zâwm lote manin pawisa an chawitir ṭhin thu te, meizuk khap tur chuan Mizoram chhunga meizuk zawrh 99% chu state pawn aṭanga siam a nih avangin sorkar laipui inrawlh a ṭul thute leh, COPTA bakah Safety and Standard (Prohibition an Restriction on Sales) Regulation, 2011 hnuaiah vaihlo leh a kaihhnawih khap a nih thute Court-ah a thlen a ni.

Vanglaini palai zawhna chhangin Aldrin Lallawmzuala chuan, "Court-in a duh khirh em em a, vaihlo aṭanga siam chhuahte khuahkhirh kawnga Mizoram sorkar hmalakna hrang hrangte affidavit hmangin eng emaw zat kan thehlut," a ti.

Aldrin Lallawmzuala sawi danin, Gauhati High Court chuan vaihlo zawrh khap lo mah se, a khuahkhirhna atana order hrang hrang a chhuahte chu khauh zawka kengkawh a, order-te awmze nei lo nihtir mai lo tur leh, sahdah leh tuibûrah pawh 'health warning' târ a nih theih nana hma la turin Mizoram sorkar hriattir a ni.