World Mental Health Day hman a ni

Nimin kha World Mental Health Day a ni a, Aizawlah hmun pathumah hman a nih bakah, district dangahte pawh hman a ni. Kumina thupui chu, ‘Dig-ni-ty in mental health - Psychological and mental health first aid for all' tih a ni.

World Mental Health Day hi sor-kar hnuaia National Mental Health Programme leh Kulikawn Damdawi-ina Psychiatry department huaihawtin Aizawla IPR Auditorium-ah hman a ni a, Health minister Lal Thanzara khuallian a ni.

Lal Thanzara chuan, ram changkang apiangin rilru hriselna an ngai pawimawh tih sawiin, "Khawthlang lamah chuan puitling tan chauh ni lo, naupangte tan pawh sikul tin khuan rilru hriselna lama anmahni pui tur counsellor an nei deuh vek a ni," a ti.

Mizote'n a huhoa khawsak nuam kan tih thu sawiin Thanzara chuan, "Rilru lama harsatna nei, chumi vanga ruih theih thila tlân ta te, mahni intihhlum duh hial khawpa rilru damlo kan tam dan aṭangte hian, a huhoa kan khawsak tam ang hû hian kan chhungril lam harsatna inhriatpui khawp turin kan inpawh leh si lo tih a chiang hle," a ti a; mihringte chu inngaih pawimawh tawn a ṭul thu a sawi.

Health Minister chuan, kum 15-29 inkarte thih chhan tam ber dawttu chu mahni nunna lâk a nih thu sawiin, "Puitling mahni nunna laa intihlumte hian an intihhlum hmain vawi 20 vel chu intihhlum an lo tum tawh ṭhina hriat an ni. Rilru ná leh zu hman khawlohna hi mahni intihhlumna chhan pakhat a nih avangin, hetiang lama harsatna neite hi ṭanpui vatin kawngro a su hlea ngaih a ni," a ti.

World Mental Health Day hi Volu-nteers for Community Mental Health (VOLCOMH) pawhin Millennium Centre tualah an hmang a; rilru hriselna lama hma latute leh zirlaite telin, Finance minister Lalsawta'n a hmanpui.

Lalsawta chuan, khawvelin hma a sawn chhoh zel rual hian mihring nitin nun leh hun hman dang a danglamin a buai chho zel tih sawiin, "Harsatna pawh a tam phahin, rilru hrisel pawimawhna a lang chho telh telh a ni. Khawvela mi hlauhawm berte chu mi beidawng, mahni nunna pawh lak hreh lote an ni. Rilru hrisel pu mite thung chu eng anga harsatna nasa in tlakbuak mahse an beidawng ngai lo," a ti.

Pachhunga University College (PUC)-ah pawh PUC-a Psychology department leh Vanglaini chanchinbu buatsaihin World Mental Health Day hman a ni a; kumina Day thupui hmangin Dr Ruth Lalmuanpuii'n thu a sawi. He ni pual hian PUC campus-ah psychological first aid chungchang banner leh phamphlet-te an sem.

Siaha-ah pawh a vawi khat nan District Health Programme leh Mara Chano Py (M.Ch.P)-te huaihawtin hman a ni a, Siaha DC Harleen Kaur khuallian niin, MADC-a executive member (Education) N Zakhai khualzahawm a ni. Second session-ah Siaha College zirlaite'n skid show an entir a, Day puala essay inziahsiaka lawmmante sem a ni.

Champhaiah chuan Venglai Com-munity Hall-ah hman a ni a, Champhai District Hospital medical superintendent Dr Lalnuntluangi Khiangte-in kaih-hruaiin, khuallian Vanlalngaihsaka, Champhai DC-in thu a sawi.

World Mental Health Day hi kum 1992-ah World Federation for Mental Health hmalakna leh World Health Organisation (WHO) ṭang dun bultumin kum tin October 10-ah hman thin a ni.

Sorkar laipuiin kum 1982 khan National Mental Health Programme a din a, chumi hnuaiah chuan India ram state tinah District Mental Health Programme din leh a ni. Mizoramah chuan District Mental Health Programme hi district pali - Aizawl, Lunglei, Siaha leh Champhai ah din a ni tawh a, kumin October aṭang hian Lawngtlai, Serchhip leh Kolasib-ah hawn belh a ni.