CM hoin Food Testing Laboratory Hman thuai theih dan tur sawiho

Health department leh Commerce & Industries department hotute chu, nimin khan chief minister Lal Thanhawla hoin CMO-a Cabinet Room-ah an ṭhukhawm a; Food Testing Laboratory (FTL) a taka hman theih thuai a nih dan tur an sawiho.

Chief Minister chuan, ram dang aṭnga ei tur chi hrang hrang lo lutte leh Silchar leh a chhehvel aṭanga thlai lâk luhte chu ei atana him lo, pesticide leh chemical fertilizer-a sâwngbâwl a ni fo tih a sawi a, "Hei hian Mizote hriselna thui tak a khawih chhiat avangin, ei tur him leh him lo enfiahna tur Food Testing Laboratory neih hi a hmanhmawhthlak hle tawh a ni," a ti.

Sorkar thuchhuah tarlan danin, FTL neih a nih theih nan Mizoram sorrkarin kum 2009 khan DPR siamin sorkar laipuia Department of Commerce-ah a thehlut a; Export Development Fund – North Eastern Region (EDF-NER) hnuaiah a dinna tur sum cheng nuai 308 hmuh a ni.

Sum hmuh chu Zokhaw-tharah Land Custom Station sakna atan ruahman hmasak ni mah se, Zorinpuia Land Custom Station leh Kawrpuichhuah Integrated Check Post-te rin theih turin Thenzawlah FTL building tur sak a ni a; FTL-a mamawh tur khawl pawimawh eng emaw zat lei a ni tawh.

Thenzawla FTL hmunah hian tui leh kawlphetha a la awm lo a, mamawhna a sàn tawh si avangin Drug Testing Laboratory, Zemabawkah khawlte chu bun rih ni se, meeting chuan an ti. Thenzawl FTL hi hman theiha peih a nih thuai theihna atan Health leh Industries department-te chuan Coordination Committee an din dawn a ni.