Truck-te Tlabung kawngah an tlân duh lo Ni tin mamawh man tisang lo turin hriattir

Lunglei district-a Truck Owners Association (LTOA) leh Truck Drivers Association (LTDA)-te Lunglei-Tlabung kawng, National Highway-302 chu a chhiat lutuk avangin nimin aṭang khan buhfai phurin an tlan duh lo ṭan nia thu dawn a ni.

LTOA leh LTDA-te hian thu-chhuah an lo siam tawhah, Lunglei-Tlabung kawngpui leh kawngpuia lei (bridge)-te chu a chhiat tawh lutuk avangin siamṭha turin sorkar an lo ngen tawh a; sorkarin an siamṭhat hma chuan October 10, Thawhṭanni aṭangin buhfai phura tlan rih loh an tum thu an puang.

LTOA leh LTDA-te chuan, Tlabung kawng chu motor tan kal ngaihna a awm tawh lo khawpa a chhiat thu an tarlang a, "Kan motor tam takin a chhiat phah bakah, tun hnaiah buhfai phur motor-in accident a tawh phah nghe nghe," an ti.

Lungleia truck-te Tlabung kawnga an tlân duh loh avang hian Mizo Students' Union (MSU) headquarters, Tlabung hruaitute leh police-te'n nimin khan Tlabunga dawrkaite zingah buhfai man tisang an awm leh awm loh an enfiah.

Thu dawn danin, Tlabung MSU leh police-te hian Tlabunga dawrkai 10-te chu lirthei tlân loh vanga buhfai an chhêk sa an hralhna man tisang lo turin an hriattir a; mipui harsatna leh phurrit siam zawnga an tih chuan a
ṭul anga hma an lak tur thu leh, buhfai bakah mipui mamawh thil dang man pawh to lutuka hralh lo turin dawrkaite an hrilh a ni.

Tlabung MSU chuan thuchhuah siamin, LTOA leh LTDA-te'n kawng chhiat vanga buhfai phurh an chawlhsan chu pawi an tih thu an tarlang a; chutih rualin, kawng dinhmun ngaihtuahin, truck neitu leh khalhtute thutlukna chu âwm an tihpui thu an sawi. Sorkar chu kawng siamṭha thuai turin an phût.

Tlabung MSU tarlan danin, Lunglei-Tlabung kawngpui hi km. 97 anga chhinchhiah a ni a, tunlai hian darkar 9-10 vel chhungin an thleng ṭhin a, darkar khatah km 9-10 vela chakin lirtheite an tlân tlangpui a ni.