Eptu party-ten gas harsatna Ching fel turin sorkar an phût

Tunlaia Mizorama gas váng leh mipuite'n harsatna an tawh mek chungchangah eptu party pathum, MNF, MPC leh ZNP-te chuan thuchhuah an siam a; gas harsatna chingfel thuai tura sorkar an ngen rualin, gas tihchingpen titawp tura Central YMA hmalakna an thlawp thu an sawi hlawm.

MNF president Zo-ram-thanga chuan nimina Mizo Hnam Rûna in-khawm-ah thu sawiin, "India mipui mitdel pawh zat lo Mizo mipui tana gas harsa em em hi a zialo tak zet a, company lam te, a phurtu lamte mawhpuh kual a ngai lo. Congress sorkar, Chief Minister leh Supply Minister-te mawh a ni a, remruat dan an thiam thlâwt loh vang a ni," a ti.

Zoramthanga chuan, gas bûkna dik a awm theih nana YMA-te hmalakna chu fakawm a tih thu a sawi.

Nimina MPC office bearer-te an party pisaa senior vice president Vanlalhlana hoa ṭhukhawm chuan thuchhuah siamin, mi pamhamte'n gas an khawih chingpen ṭhin vanga Mizo mipuiin hun rei tak chhung gas bûk tling lo an lak titawp tura CYMA hmalakna chu fakawm an tih thu leh an thlawp thu an tarlang a. "Gas tichingpentute leh mi ṭhenkhat inthurualte vanga Mizoramin gas a harsatna a tawh phah tiziaawm tura CYMA hmalakna hi ṭhahnemngai taka ṭawiawm turin mipui kan ngen a ni," an ti.

MPC party chuan, Mizoram sorkar chu gas tichingpentute chunga action a lak ngam loh chhan sawifiah tur leh CYMA-in gas tihching-pen chíngte aṭanga gas bûr 604 chuang an mante an tih zui zel dan sawifiah turin an phût a ni.

ZNP president Lal-duhoma pawhin an party pisaa inkhawmah thu sawiin, gas harsatna thleng mek siam ṭhat a nih theih nan Mizoram mipuite ṭang rual turin a chah a, "Gas phurtute'n kan hnam min hmusit a, kha leh chen a bûktling min phurh thlensak duh loin, khawih chingpen hnu chauh min phurh thlensak ṭhin. He thil dik lo titawp tur hian tun hi Mizo mipui kan ṭan rual hun a ni,” a ti.

Lalduhoma chuan, gas bûk tling lo Mizorama phurh thlen ṭhin a nih chhan chu sorkar kal tawh zawng zawngte chak loh vang nia sawiin, "Hun rei tak gas bûk tling min phurh thlentir thei lotu sorkar kan hrawn avangin ngaiah an lo neih tawh. Hei hi tlàwmthlak kan ti a, thinurthlak kan ti," a ti a; Central YMA hmalakna a fak rualin, Mizoram sorkar tun aia nasa lehzuala ṭan la turin a phût a ni.