KHAWTHLIR

Thisen pe

Public Higher Secondary School, Ramhlun Venglai chuan nimin khan an sikulah blood donation camp an huaihawt a, mipa 40 leh hmeichhia 10-te'n Aizawl Civil Hospital tan thisen unit 50 an pe. ACH blood bank-ah vêk Salvation Army-a Enna Corps leh Wesleyean Methodist kohhran ṭhalaite'n unit 9 ve ve an pe bawk.

E-office sawiho

UDPA minister Zodintluanga hoin nimin khan a pisaah UDPA department, Information and Communication Technology department leh National Infomatic Centre hotute an ṭhukhawm a; UDPA secretariat leh directorate-te e-office anga hna thawk tura hmalakna kalpui mek chungchang an sawiho.

Maxicab tlan lo

Hachhek Constituency Maxicab Welfare Society chuan thuchhuah siamin, Hachhek constituency huam chhunga kawngpui, ABCI company enkawl mek chu a chhiat tawh lutuk avangin October 10-16 chhung an tlan dawn loh thu an puang a; mipuite hriatthiamna an ngen.

Heroin man

Excise & Narcotics department leh SRS ṭangkawp chuan nimin khan Dawrpui Vengtharah heroin gram 169 leh a neitua puh Lalthangmawii (40) d/o Ṭha-tinzuala (L), Khawzawl Venglai; Lalremruata (27) s/o Hmingthianghlima, Damveng, Aizawl leh Chungliana (40) s/o Hrimthang (L), Myanmar nia insawite an man.

Lehkhabu tlangzarh

J Lalhmangaihsanga'n sipaia ṭan tumte tana a buatsaih ‘Army Recruitment Guide’ tih chu nimin khan Mizoram Youth Commission chairman T Sangkunga'n Aizawl Press Club-ah a tlangzarh.

Faina Hapta

Kolasiba Faina Hapta hman chu nimin khan Diakkawn YMA hall-ah khar a ni a, DC H Lalengmawia'n a hmanpui. Inkhawmah hian Faina Hapta hman chhunga intihsiakna hrang hranga tiṭhate hnenah lawmman sem a ni a, veng fai berah Ṭumpui Veng leh office fai berah Minor Irrigation EE Office thlan an ni.