Land Revenue & Settlement deptt.-in Stamp duty sáng uchuak loah a ngai

11th October, 2016

Land Revenue & Settlement (LRS) department chuan thu-chhuah siamin, tun hnaia Mizo-rama The Indian Stamp (Mizoram Amendment) Act, 2016 hmanga stamp duty rate tihsan chu uchuak taka tihsan a ni lo niin an tarlang.

LRS department chuan, Indian Constitution-a Schedule VII-a entry 63 leh 66-in State Legislature hnena thuneihna a pek hmangin state sorkarin registration ree a la a, Schedule VII-a List-III entry 44-na hmangin stamp duty lak a ni tih sawiin, chu chu state sorkar sum hnár pawimawh tak a nih thu a sawi a, "Registration Act, 1908 leh Indian Stamp Act, 1899-te hi khua leh tuite'n dan ang taka ram an neih theihna tura ram neitu an ni ngei a ni tih sorkarin a chhinchhiahna pawimawh a ni," a ti.

Revenue department tarlan danin, The Indian Stamp (Mizo-ram Amendment) Act, 1996-ah chenna hmunhmá ni lo ramah stamp duty chu thingtlangah Rs. 500 zelah Rs. 15 lak a ni a, chu chu 3% a ni. Municipal Corporation huam chhung leh a chhehvelah chuan Rs. 500 zelah Rs. 45 lak a ni a, chu chu 9% a ni thung.

Chenna hmunhmá ramah chuan Rs. 1,00,000 aia tlemah Rs. 100 leh, Rs. 10,00,000 aia tamah Rs. 47,500 bakah, Rs. 10,00,000 a pelhna
aṭangin stamp duty 10% lak a ni.

Indian Stamp (Mizoram Amend-ment) Amending Act, 2007-ah chuan, chenna hmun-hmáah in (building) a telin, Rs. 1,00,000 aia tlemah stamp duty Rs. 100, Rs. 1,00,000 - 5,00,000 inkarah Rs. 250, Rs. 5,00,000 aia tamah Rs. 500 lak a ni a; chenna hmun ni lo rama stamp duty rate tihdanglam a ni lo.

LRS department chuan, chenna hmun ni lo ram aṭanga stamp duty sáng taka lâkin huan lo ram neia ei zawng duhte tan harsatna nasa tak a siamsak thei tih sawiin, "Chenna hmun ni lo ram lei leh hralhna aṭanga stamp duty tihtlem hian nasa takin kut hnathawktute tan hamṭhatna a siamsak a, ei leh bara intodelh kawngah mipui vantlang tan awlsamna a siam ngei beiseiin, 2%-ah tihhniam a ni a, chenna in dinna hmun leh chenna hmun ni lo aṭangin stamp duty rate thuhmun hman a ni," a ti.

Revenue department chuan,
ṭhenawm state-ah chuan Mizoram aiin stamp duty an lak sang zawk nia sawiin, "Manipur-ah 7%, Meghalaya-ah Rs. 1,50,000 a pelhin 9.9%, Nagaland-ah 7.5% leh Tripura-ah 5%-te lak a ni," an ti a; state dangte nena khaikhinin, Mizorama stamp duty lak chu a sang uchuak lo niin an tarlang.

Hetih lai hian, eptu party MNF chuan stamp duty rate chu uchuak taka tihsan nia sawiin, stamp duty leh registration fee-te chu sûta ennawn turin sorkar an lo phût tawh a; stamp duty rate punna chu a hniam berah pawh 1900% a niin an sawi. "Hmalakna a taka hmuh tur a awm loh chuan mi retheite thlavâng hauhin tihhniam a nih hma chuan a ṭul angin hma kan la zel dawn," an ti.

Stamp duty pun dan (MNF chhût dan)

In hmun man/ Rate hlui Rate thar Punna Punna%

In hmun hlutna

Rs. 1,00,000 Rs. 100 Rs. 2,000 Rs. 1,900 1900%

Rs. 5,00,000 Rs. 250 Rs. 10,000 Rs. 9,750 3900%

Rs. 10,00,000 Rs. 500 Rs. 20,000 Rs. 19,500 3900%

Rs. 15,00,000 Rs. 500 Rs. 30,000 Rs. 29,500 5900%

Rs. 20,00,000 Rs. 500 Rs. 40,000 Rs. 39,500 7900%

Rs. 25,00,000 Rs. 500 Rs. 50,000 Rs. 49,500 9900%

Rs. 30,00,000 Rs. 500 Rs. 60,000 Rs. 59,500 11500%

Rs. 35,00,000 Rs. 500 Rs. 70,000 Rs. 69,500 13900%

Rs. 40,00,000 Rs. 500 Rs. 80,000 Rs. 79,500 15900%

Rs. 45,00,000 Rs. 500 Rs. 90,000 Rs. 89,500 17900%

Rs. 50,00,000 Rs. 500 Rs. 1,00,000 Rs. 99,500 19900%