Chak zawka ruihhlo dona tur dan Sorkarin siam thar a tum
Mizoram sorkar chuan ruihhlo khuah-khirhna tur dan siam thar a tum a, dan tur hi duan fel a ni tawh. Dan thar hmang hian ruihhlo chak zawka do a nih theih sorkar chuan a beisei.
Ruihhlo khuahkhirhna tur dan duan thar hi The Mizoram Drug (Controlled Substances) Bill, 2016 tih a ni a; Bill hi Council of Minister chuan pawm tawhin, Assembly session neih hmasak berah put luh a, pawm tum a ni ang.
Bill siamnaah hian Social Welfare department chu nodal department a ni a; dan hi hman a nih chuan a kengkawhtu tur erawh Police, Excise & Narcotics leh Health department-te an ni ang.
Vanglaini palai zawhna chhangin Social Wefare minister PC Lalthanliana chuan, dan an duan thar hi ruihhlo dona dan India ramin a neih hrang hrangte kalh si loa siam a nih thu a sawi a, "Dan hrang hrangin a huam loh Mizoramin a mamawh site dan thar tur duanah hian seng luh a ni a, dan awm sate nen a indîpdâl lo tura tih a ni," a ti.
Dan duangtute'n tarlan danin, The Nar-cotic Drugs and Psychotropic Substances (NDPS) Act hnuaia ruihhlo vanga man thiam loh changte tàn hun chhung rei lo ber kum 10 tih chuan ruihhlo vanga man thiam loh chang an tlem phah nia hriat a ni a; The Mizoram Drug (Controlled Substances) Bill, 2016 hnuaiah chuan ruihhlo kaihhnawiha mante tan hun chhung rei lo ber chu kum 5 ni tura ruahman a ni.
NDPS Act hnuaiah chuan ganja chu a pár leh a rahte cannabis thlai anga tarlan a ni. Mahse, Mizorama ganja an mante chu cannabis hnah phoro túr ngah tak, a pár leh a rah tel lo a ni a; chuvangin, ganja vanga mante hremna a ṭha tawk ṭhin lo. Dan thar tura ruahmanah chuan, eng thil pawh Mizoram sorkar chuan notification hmangin controlled substance-ah a puang thei dawn.
In chhunga ṭangkai taka hman ṭhin Dendrite leh Erasex-te chu NDPS Act hnuaiah telh a ni lo a, mahse, hengte hi túr hlauhawm tak, Mizoramah ṭhalai tam takin an hman sual a nih avangin, dan thar tura ruahmanah chuan Mizoram sorkarin notification hmangin controlled substances-ah a puang thei ang.
Pseudoephedrine pawh NDPS Act hnuaiah chuan thawn chhuah leh lak luh chiah hrem theih a nih avangin, drugs licence neite'n dan bawhchhe si loin methamphetamine siamna atan Mizoram páwna an thawn chhuak
ṭhina hriat a ni. Hei vang hian, dan tharah chuan pseudoephedrine chu khauh zawka khuahkhirh a nih theih nan notification hmangin controlled substances-ah puan theih a ni dawn.
Hengte bakah hian, ruihhlo dang chi hrang hrang, dan hnuaia mumal taka khuahkhirh si lohte chu dan thar hnuaiah sorkarin controlled substance-ah a puang thei dawn a ni.