Edenthara NH-54 kawngpui min vangin Kawng chhak lam laih zau tum a ni

October 10, 2016 chawhma lama National Highway no. 54 kawngpui, Edenthar Veng pûng bula a chhuat bal chu Mizoram PWD-in a thawm ṭhat dan tur an ngaihtuah mek a, kawng chhak lam laih zauh belh tum a ni.

Hetih lai hian, Edenthar Veng mite chuan kawng min chu a hma pawhin tlem tlema a min zeuh zeuh tawh avangin, a min nasa tur ven kawngah sorkarin hma a la ṭha tâwk loa an ngaih thu an sawi.

Kawrte, Zotuilui tia sawi ṭhina NH-54 kawngpui min hi a hmunah enfiah a ni a; kawngpui blacktop chin chu a min deuh vek a, ft. 2 vel erawh a min tel lo. Ft. 2 vel min tel lo pawh hi a hnuai lamah a min pûk tawh avangin lirthei tan rah ngam a ni lo. Blacktop loh chin kawng chhak lamah lirthei tê chite chu an kal ṭhin a, lirthei lian kal phal a ni lo.

PWD hotute sawi danin, lirthei lian kal theihna turin PWD hotute'n kawng thawm ṭhat dan tur an ngaihtuah a; kawng chhak lam ko sang tak, lung hmun chu laih zauh belh a, lirthei lian kal theih nan siam tum a ni. Kawngpui chhak lamah hian Power & Electricity transformer a awm a, chu pawh chu sawn a ngai dawn a ni.

Zotuiluia kawng chhak lam aṭanga tui luang chu hume pipe lian pahnih daha luantir tum a ni a, kawng chhak lam laih zauh a nih theih nan kawng zauhna tur chin ram chu mimal ram a nih leh nih loh enfiah phawt a ni ang. Kawng thlang lama lei min zel tur ven nan gabion wall siam tum a ni bawk. Kawng siam hna thawk tur (contractor) hian Hrangthankima, Edenthar Veng thlan a ni.

Edenthar mite hmuh dan

Kawng minna bul hnaia khawsa leh Edenthar Veng mi ṭhenkhatte chuan NH-54 kawngpui min hi ngaihsak ni se chuan ven theih nia an ngaih thu an sawi.

Edenthar Veng pa pakhat, lei minna hmuna hna thawk ṭhin leh tui lakna pipe siam ṭhintu chuan, NH-54 kawngpui hnuaiah (culvert) Zotuilui tui luanna turin hume pipe pahnih a awm thu a sawi a, "Hume pipe pahnihte hi kutphah bawk vela insi loa dah a ni a, pipe lian pahnih inkar chu plaster a nih loh avangin a inkarah tui a lut thei a, hume pipe inkara tui lut chuan a hawrh zel a, a min ta niin ka hria. Pipe pahnih inkarah tui lut lo se chuan a min ka ring lo," a ti. Hume pipe inkar phui lo leh tui pût chu thuneitu lamin an ngaihsak lo nia a hriat thu a sawi.

Kawng minna bula khawsa nu pakhat chuan, tuna kawngpui min chu kumin August thla, Hunthar Venga lei a tawlh vak lai velin tam tham loin a min zauh zauh tawh thu a sawi a; a min belh zel tur venna turin hmalakna a awm a hriat loh thu Vanglaini palai a hrilh.

Lirthei tlân dan tur

Lirthei te chi bâk a kal tlang theih loh avangin traffic police lamin lirthei tlan dan tur an ruahman nghal.

Traffic SP C Lalthanmawia sawi danin, kawngpuiah hian maxicab aia lian motor tlan tlang phal a ni lo. Kawng siam ṭhat hna thawh hunah phei chuan kawng hi khâr a ngai dawn.

Silchar lam aṭanga Aizawl lam pan lirthei liante chu Kawnpui aṭangin Lungdai-Durtlang tlang kawngah kal tur a ni a, tlai dar 5 leh a tûk zing dar 6 inkarah Aizawl an luh phal a ni ang.

Motor lian, ke 10 nei chin chung lam zawng chu NH-54 Kawnpui-Sairang kawngah kalin, Ch. Saprawnga Truck Terminal-ah an ding ang a, chuta
ṭang chuan Hunthar Venga Company Péng aṭangin Vaivakawn lamah kal tur niin, zan dar 10 leh a tûk zing dar 2:30 inkarah khawpui chhung luh phal a ni ang.

Aizawl aṭanga Silchar lam pan turte chu Vaivakawn lam kawngah zing dar 3:00 - 6:30 inkarah an kal thei ang a; zan dar 10 leh zing dar 7 inkarah Temple Square leh Company Péng inkar kawngpui sirah lirthei eng chi mah hûn phal a ni lo. Truck ruak reng reng, Aizawl khawpui chhung lûn laiah din theih a ni lo bawk.

Truck ruak, Silchar lam pan turte chu Durtlang-Lungdai-Kawnpui kawngah zing dar 8 aṭanga tlai dar 4 inkarah an kal thei bawk a; Tanhrila FCI Kudam aṭanga lêt tur truck ruakte chu Sakawrtuichhun lam kawngah an kal thei bawk a ni.