Thanzara'n Sialhau YMA platinum jubilee hmanpui

Sialhau Branch YMA chuan nimin khan an khaw community hall-ah an kum 75-na, platinum jubilee an lawm a, Information & Public Relations minister Lal Thanzara leh bialtu MLA Lalrinawma ten an hmanpui.

Lal Thanzara chuan, YMA chu pawl thianghlim a nih thu sawiin, "YMA hi vawiin thlengin mirethei leh chanhaite
ṭhian, khawtlang leh vantlang nun siamṭhatna kawnga pawl ṭangkai ber, sorkar kutke pawimawh tak a ni. Kan ramin YMA a nei hi Pathian malsawmna ropui tak a ni," a ti a; Sialhau mipuite chu an khawtlang leh YMA hruaitu ni tawhte zaha chawimawi thiam turin a chah.

YMA-in ruihhlo do beihpui a thlak mek tih sawiin, Lal Thanzara chuan, "Kan ṭhalai ruihhlo bâwiha táng mekte simtir a, an thlarau pawhin chhandamna an chan theih nan Pathian rawngbawltute phungbawmah sawmin hma a la hial a. Chutih laiin, kan ramah zu loa nung thei lo tam tak an awm tih sorkar-in a hriat avangin chung mite'n zu ṭha deuh zawk in tur an hmuh theih nan ruahmanna siam a ni," a ti.

Lal Thanzara hian Sialhau YMA hnenah dekchi lian pakhat, no leh thleng 50 ve ve a pe a; YMA, MUP leh MHIP hnenah silpauline pakhat ṭheuh a pe bawk.

Khualzahawm Lalrinawma pawhin thu sawiin, Sialhau khawtlang chu khaw inlungrual, entawntlak leh khawtlang taima tak a nih thu a sawi a, "A hminga bialtu ka nih laia jubilee a thleng hi a lawmawm hle a ni," a ti.

Sialhau khua hi Serchhip district-a awm a ni a, kum 1929-ah tuna an khaw awmnaah an hmun hlui aṭangin an insawn lut. Tunah hian in 106 awmin mi 550 vel an chêng mek a, YMA member chu 285 an ni.