Hmasawnna hnathawh enfiah tum

Chhimbial Chhantu Executive Committee nimina Lunglei MZP pisa-a
ṭhukhawm chuan, Lunglei khawpui chhunga hmasawnna hnathawh hrang hrangte enfiah an rel.

Meeting-ah hian Lunglei HPC-in RTI Act hmanga an zawhna an chhanna chu an zirchiang a, HPC sum hmanga hmasawnna hnathawh hrang hrangte chu a hmun ngeia endik an rel a, hnathawh a nih dan enfiah turin sub-commmittee an din nghal a, anni hian a ṭul angin hma an la dawn a ni.

Lunglei Civil Hospital-a doctor sawn chhuah chungchanga MZP hmalak mek-na meeting chuan an thlawp a, "He an hmalakna hi ngaih pawimawh a nih loh chuan, MZP nen hian meeting neih za a, a ṭul anga chak taka hmalakpuina nei tura ruahmanna siam nise," an ti.

Lunglei Dist Truck Owner Association leh Lunglei Dist Truck Driver Association-te'n Tlabung kawng a chhiat luat avanga buhfai phur rih tawh lo tura thutlukna an siam pawh thlawpin, kawng hi siamṭhat thuai a nih theih nan a ṭul anga truck owner leh driver association hi meeting neihpui a, hmalakpui an rel a ni.

Tennis Court hluia police station sak tum dodal chungchangah All NGO Co-ordination in Public Resolution, Home Ministry leh sorkar thuneitute hnena an thlen chu ngaihchan ni se, an ti.