Kalphung pangngaiin inkharkhip hrih tur Ruahmanna thar kan siam thuai ang - CS
Prime minister Narendra Modi-a'n kumin March 24 zan dar 12 aṭanga ni 21 chhung India ram puma inkharkhip a puan chu nizan dar 12 khan a tàwp a, nimin khan May 3, 2020 thleng inkhârkhip chhunzawm tur a nih thu a puang leh nghal. Mizoram sorkar chuan April 13 tlai khan April 30 thleng inkharkhip a nih tur thu a lo puang tawh a, inkhârkhip hi a hmaa kalphung ngaia kalpui zel phawt tur a ni.
Mizoram sorkar chuan inkhârkhipna kalphung thar duang turin chief secretary Lalnunmawia Chuaungo kaihhruai State Level Task Force (SLTF) a ruat. SLTF hi district leh local level task force ráwn tur leh Chief Minister hoa minister, offi cial, tlawmngai pawl, kohhran hruaitu, VC leh LC hruaitu, zirlai pawl hruaitu leh doctor pawlte meeting-a sawihonate ngaihtuah tel tura tih an ni.
Vanglaini palai zawhna chhangin Chief Secretary chuan, inkhârkhip kalphung thar duan a la nih loh thu a sawi a, "Naktuk (vawiin) chawhma dar 9:30-ah Union Cabinet Secretary hoin video conferencing neih a ni dawn a, chutah chuan sorkar laipuiin kalphung tura ruahmanna a neihte sawi a ni ang," a ti.
Chief Secretary chuan, sorkar laipuiin ruahmanna a siam ang diak diaka kal a nih kher loh tur thu sawiin, "Central sorkarin ruahmanna a siam nena intibuai si loin Mizoram kalphung tur siam a ni ang. Kalphung thar hi siam thuai kan tum," a ti a; SLTF chu vawiin chawhnuah an ṭhutkhawm a beisei thu a sawi. Ni tina eichawp zawngte'n hna an thawh theih dan tur ngaih pawimawh a nih dawn thu sawiin Chief Secretary chuan, "A hma pawha kan ngaih pawimawh a ni. SLTF-in kan thurelte Chief Minister hnenah kan thehlut ang a, tlaiah emaw a tûk chawhma lamah emaw chuan kalphung thar tur kan peih hman kan beisei," a ti.
Tarlan tawh angin, Chief Minister hoa minister, offi cial, tlawmngai pawl, kohhran hruaitu, VC leh LC hruaitu, zirlai pawl hruaitu leh doctor pawl hruaitute ṭhukhawm chuan inkharkhip pawhsei ṭha an ti a; thusawitu tam zawk chuan inthlahdul deuha inkharkhip ṭha an tih thu an sawi a ni.