CM hoin Hortoki kawng sawiho dawn

Tuirial bialtu MLA Hmingdailova Khiangte chuan nimin khan a biala Hortoki khua a tlawh a, kawng chhia vanga harsatna an tawh mek chu Chief Minister hoa sawiho a nih tur thu a sawi.

Hmingdailova Khiangte chuan Hortoki khawtlang hruai-tute a kawmnaah, "Thla liam ta maia in kawng chhiat vanga lung-awi lohna in lantirnaah sorkar thu ngaichânga boruak duhawm lo zawk thlenpui loa in awm kha a lawmawm hle. In khaw kawng chhe lutuk vanga harsatna in tawh mek hi sorkarin a hria a, tun kar Ningani khian Chief Minister hoin sorkar mi pawimawhte'n an sawiho ang," a ti.

Hortoki khawtlang hruaitute chuan, an khaw kawng chhiat avangin mihring phur lirthei an tlân duh loh thu te, damlo pawh lawng hmanga Tlawng luia phurh an ngaih thute leh vawiin (October 11) hian mipui mamawhna vangin 207 pick-up chu Hortoki leh Kolasib inkarah a tlan tur thute an hrilh.

Hmingdailova Khiangte hi Kawnpui SDO (Civil), PWD SDO, Kawnpui Police Station OC leh Kawnpui Sub-Division V/C Association hruaituten an ṭawiawm.

Hortoki khawtlang chuan, rél kawng laih mek vanga an khaw kawng chhiat avangin kawng an lo dang tawh ṭhin a, Chief Minister hnenah pawh Kawnpui leh an khaw inkar kawng km. 18-a thui Railways motor lianin an rah chhiat siamṭha thuai turin Railways an phût thu an lo hrilh tawh a ni.