KHAWTHLIR

MBSE chuan Higher Secondary School Leaving Certificate (HSSLC) Examination 2020 kal lai, inkhârkhip vanga zawh hman loh leh hmabak la awmte chu April 22 aṭanga chhunzawm tur a nih thu nimin khan thuchhuah siamin a puang. Ruahman dan chuan, April 22-ah Economics/Chemistry (T), April 23-ah Sociology leh, April 24-ah Computer Science (T) / Home Science (T)-te exam tur a ni a, exam hun chhung chu chawhma dar 10 leh chawhnu dar 1 inkar a ni ang.

Zoram Medical College (ZMC) aṭanga Vanglaini thu dawn danin, damdawiin ICU-a enkawl mek Covid-19 vei chuan ziaawm lam a pan zel a, nimin chhun dar 12 vel khan ventilator phawi a ni a, oxygen pek chhunzawm zel a nih rualin, a mamawh tlem tial tial a, Covid-19 natna pawh a lang chhuak khát tawh. ZMC-SRH Bulletin pawhin Covid-19 vei damlo chuan ṭhat lam a pan zel thu tarlangin, "I ṭawng ṭaipui zel ang u," a ti. 

Covid-19 hrik pai leh pai loh enfiahna hmanraw pakhat, Viral Transport Media (VTM) 1,800, Indian Council of Medical Research (ICMR) aṭanga an rawn thawn chu nimin khan Indian Air Force (IAF) thlawhnain Lengpui Airport-ah a rawn thlenpui a, Zoram Medical College-ah lak nghal a ni. 

MZP hruaitute chuan an president B Vanlaltana hoin nimin khan Covid-19 laka invenna tura Mizoram leh Tripura/ Assam ramri depa awm Zawlnuam, Luimawi leh Kanhmun duty post hrang hrang an tlawh. Hemi chung changa MZP thuchhuah chuan, Covid-19 laka Mizo mipui an him theih nan ramri hrûla duty post awmte hneh taka vil turin sorkar an ngen a, duty-te'n mamawh an thlente ngaihsaka a ṭul anga hma la thuai ṭhin turin sorkar thuneitute an ngen tih an tarlang.

Mizoram police chuan ni khat hlawh an thawh khawm Rs. 1,41,64,972 chu nimin khan Chief Minister's Relief Fund-ah an hlân. Sports department-in Rs. 3,78,667, KVK-in Rs. 1,05,000, Commerce & Industries (Commerce Wing)-in Rs. 1,00,850, Zarkawt Presbyterian Kohhranin Rs. 1,00,000, Sinlung Hills Council-in Rs. 1,00,000, YWCA-in Rs. 53,100, AMMSU Imphal-in Rs. 20,000 leh IKK Vaivakawn-in Rs 10,000 an pe bawk.