Ramri khauh taka vêng turin CM-in sipai hotute a hrilh

Chief minister Zoramthanga chuan nimin chawhma khan novel coronavirus hri léng mek laka khauh zawka ramri venhim a nih theihna turin CM Cabinet Meeting roomah Home department, Assam Rifl es leh BSF hotute a kâwm a, Home minister Lalchamliana'n a ṭawiawm.

CM Zoramthanga chuan, Assam Rifl es leh BSF hotute chu Mizoram police, task force-te leh tlawmngai pawl dangte nen thawhhona ṭha tak an neih a pawimawh thu a hrilh a, "Tuna kan hun tawn mek hi hun pangngai ang a nih loh avangin ni danga kan thawh dan baka hma kan lak a ṭul," a ti a, ngawrh leh zuala duty turin a chah. Inkawmnaah hian Assam Rifl es leh BSF hotute chuan ramri hrûla an duty dan tlangpui leh hri lèn hnua hma an lak tawh dante an sawi ve bawk. He hunah hian chief secretary Lalnunmawia Chuaungo leh additional chief secretary JC Ramthanga te pawh an tel a ni.