AR-in remna lantir dawn
Inspector General Assam Rifles (East) ruahman angin October thla chhung hian hmarchhak state ṭhenkhatah mipuite tan programme hrang hrang siam a ni dawn a, 'Friends of the Hill People for Peace' tih thupui hmangin Parva, Lawngtlai district aṭangin bul an ṭan ang a, Tripura-ah an zo dawn a ni.
Mizoram khaw hrang hrang tlawhin mipuite tan thil ṭha tiin inṭhian ṭhatna leh remna entirna hun an duang a, Aizawl district-ah chuan 39th Assam Rifles-in an buaipui ang.
A lawmna pui ber tur pakhat chu October 19 hian Lammualah neih a ni dawn a, he hunah hian chief minister Lal Thanhawla chu khuallian a ni ang. Chawhnu dar 3:00 aṭangin Lammualah ennawm hrang hrang lantir a ni ang a, tlai dar 4:30-ah Assam Rifles Football Team, Shillong leh Mizoram Premier League-a hmahruaitu Bethlehem Vengthlang FC-te Lammualah an inkhel ang. October 20 zing dar 6:00-ah Lammual aṭangin a huhoa tlan runpui buatsaih a ni dawn a, a hmingah 'Run for Fun' tih a ni a, a duh apiang tlan theih a ni.
Deputy Inspector General, 23 Sector Assam Rifles Brig MS Mokha chuan he hunah hian Mizo mipui a tam thei ang ber Lammuala kal turin a sawm a, ennawm hrang hrang leh inkhelte hi en man a awm lo ang.