State pawna Covid-19 kai thar Mizote chanchin Health Minister-in a sawifiah

Health minister Dr R Lalthangliana chuan nimin khan a inah April 13, Thawhṭannia Mumbai leh Shillong-a Covid-19 kai Mizo pahnih hmuh chhuah chungchang a sawifiah a; Shillong leh Mumbai-a Mizo awmte chu thlaphâng lo tur leh harsatna an tawhte sorkar thuneitute hnenah thlen zel turin a chah.

Dr R Lalthangliana chuan, Mumbai-a Covid-19 kai hmuh chhuah thar chu hnute cancer vanga Mumbai-a hun eng emaw chen inenkawl tawh a nih thu sawiin, "Thawhṭanni kha a inzai hun tur a nih avangin April 12, Pathianni chawhnu dar 2 khan TATA Memorial Hospital-ah admit a ni. Hemi ní vek tlai dar 5 velah a khua a sik ṭan a, nasopharyngeal swab lak niin, zan dar 11-ah test a ni a, test result hi Thawhṭanni zing dar 6 khan chhuakin, positive a ni tih hriat a ni," a ti. Health Minister sawi danin, Mizo nu Covid-19 vei chu St. George’s Hospital ICU-ah admit zui a ni. Thawhṭanni zan aṭangin Covid-19 natna lan chhuah dan anga a awm rih loh avang leh a taksa pawh ngaihtuahawma a awm loh avangin private ward-ah sawn tura ruahman a ni a; swab sample pawh lak nawn leh tawh niin, he thu ziah lai thleng hian result nghah mek a ni.

Minister hian nimin tlai khan Tata Memorial Hospital director Dr CS Pramesh a bia a; Director chuan, Mizo cancer vei dangte sample test tura lâk mek chu an result nghah phawt a ni ang a, an result azirin an damdawiinah enkawl chhunzawm dan tur ngaihtuah a ni dawn tih a lo hrilh. Chief secretary Lalnunmawia Chuaungo chuan, Covid-19 kai thar Mizo an awm tih a hriat veleh Mumbai-a sorkar hotute leh Mizoram House enkawltute a be nghal tih sawiin, "Mumbai Mizoram House pawh Thawhṭanni vek khan damdawi (disinfectant) hmanga phuh nghal a ni. House-ah hian cancer vei mi 16 leh anmahni enkawltu mi 32, an vaiin mi 48 an awm mek," a ti.

Chief secretary sawi danin, Mumbai Mizoram House-a awmte chu nimin khan Mumbai Municipal Corporation-a damdawi lam thawktute'n endikin, mi 22-te nasopharyngeal swab sample chu test turin an la a; nimin thleng khan sample lâkte leh damlo awmpuitute zingah Covid-19 natna nei anga lang an awm lo. Dr R Lalthangliana chuan, Mumbai-a Covid-19 kai damlo pasal pawhin Covid-19 a kai anga thuthang awm chu belhchian dâwl lo a nih thu sawiin, "Fimkhur thilah March 15, 2020 hnu lama Mumbai Mizoram House chhuahsana Mizoram rawn haw mi 11-te pawh an chanchin sorkarin a ngaihven zui nghal a, tun dinhmunah hlauhthawnawm tur a awm lo," a ti a; mi 11-te chu chawlhkar khat chhung an in ṭheuha inkhung hrang rih tura hriattir an nih thu a sawi.

Shillong-a Covid-19 natna kai thar Mizo doctor pakhat chungchang sawiin Health Minister chuan, " A thawhna Bethany Hospital leh NEIGHRIMS Hospital-a doctor-te chuan damlo hi a dinhmun a ṭhat thu an sawi. ICU-ah dah a ngai lo a, Bethany Hospital private ward-ah enkawl mek a ni," a ti. Shillong-a Mizo awmte chu thlaphâng lo tur leh harsatna an tawhte sorkar thuneitute hnenah thlen zel turin a chah a ni.