LSA-in LADC sorkar ṭhiah an phût; LADC leh DC-a pisa kai tur an dang

Lai Student Association (LSA) Gen.Hqrs. chuan Lai Autonomous District Council (LADC) sorkar ṭhiah an phût a, an thil phût nawrna atan nimin khan LADC pisa leh Lawngtlai DC pisaa thawkte pisa kai tur an dang.

Vanglaini palai zawhna chhangin LSA president K Lalhuliana chuan, pisa kai tur dan chu vawiin Nilaini-ah pawh chhunzawm an tum thu a sawi a, "Chawhnu dar 1 vel thleng pisa kai tur kan dang a, harsatna leh buaina chhuak a awm lo. Keini chuan LADC sorkar ṭhiah a, inthlan buatsaih ṭhat kan duh. Kan ngenna chungchangah Governor aṭanga thu lawmawm kan hmuh hma chuan pisa kai tur dan chhunzawm zel kan tum," a ti.

LSA hruaitute hian April 30, 2025 khan Lawngtlai Press Club-ah thuthar thehdarhtute kâwmin, LADC sorkar ṭhiat a, inthlan buatsaih tura ngenna Governor hnenah ziaka an thehluh thu an lo sawi tawh a, "MDC-te chêt duh dan hi ram mualphona a ni. Sorkar thar a pian theih nan inthamna leh chanvo ṭha intiamkamnate a awm niin kan hria," an ti a; MDC-te'n an mimal hamṭhatna an ûm nasat vangin LADC a mualpho nia an ngaih thu an sawi.

An ngenna chung­changah thu dawn an neih loh avangin LSA chuan May 2, 2025 khan thuchhuah siamin, ni li chhunga LADC ṭhiahna order chhuah a nih loh chuan pisa kai tur an dan tur thu an tarlang a ni.

LSA chuan, 11th LADC chu an aiawh atana an thlan lalte'n mipuite ngaihtuahna nei lêk loin anmahni mimal hamṭhat duh luat vangin nasa takin a buai mek tih sawiin, "Ram leh hnam ang pawhin nasa takin kan mualpho mek. Sorkar mumal tak a awm theih loh avangin vawiin thlengin LADC hi budget pass thei loin a awm a, LADC hnuaia thawkte'n thla hnih hlawh an lak theih loh phah," an ti a, harsatna nasa tak an tâwk tih an tarlang.

LADC sorkar kal mekah hian chief executive member (CEM) ṭum li lak luh tawh niin, CEM pathum an awm tawh a, V Zirsanga chu MNF leh ZPM sorkarah CEM a ni tawh. LADC inthlan hnuhnung ber December 2020-a neihah MNF-in hneh takina sorkarna siamin, Manghmunga Chinzah chu CEM a ni a, chumi hnuah MNF sorkar thoin V Zirsanga chu CEM a ni. Nikum khan MNF MDC eng emaw zatin an chhuahsan avangin MNF leh Congress partyte'n sorkar inṭâwm an siam a, Congress MDC awm chhun C Lalmuanthanga chu CEM a ni.

MNF leh INC inṭawm chu kumin kum tir lam khan a tlu leh a, February 27, 2025 khan ZPM kaihhruai sorkar piangin, MNF sorkara CEM lo ni tawh V Zirsanga chu ZPM sorkarah CEM atan lak luh a ni.

Tunah hian MNF leh BJP chuan sorkarna siam an tum mek a, Congress MDC-in pawn lam aṭanga thlawp a tum. ZPM aṭanga BJP zawmtu N Zangura chu MNF leh BJP MDC-ten leader (CEM) atan thlan a ni.

Governor Gen. VK Singh chuan N Zangura hi LADC CEM atan May 2 khan a ruat a, ni 10 chhungin CEM atana thlawptu a ngah tawk leh tawk loh fiah turin a ti nghal.