Science-ah hmasawnna nasa tak a awm - MBSE Chairman
Mizoram Board of School Education (MBSE) chairman JH Zoremthanga chuan, HSSLC Examination 2025-a zirlai hlawhtlingte an lawmpui a, hlawhtling zo lote beidawng lo tura an duh thu leh, science stream-ah hmasawnna nasa tak a awm thu a sawi.
HSSLC 2025 result tihchhuah hnua thuthar thehdarhtute'n an kawmnaah JH Zoremthanga chuan, nikum aia kumin pass percentage a sang chu an lawm thu leh zirtirtute puala district tina higher order thingking skills (HOTS) question set training an buatsaih ṭhin chuan zirlaiteah hmasawnna a thlen nia an hriat thu a sawi a ni.
Nikumah science zirlaite pass percentage 72.69% a nih laiin, kuminah 85.63% a nih thu sawiin JH Zoremthanga chuan, "Science-ah hma kan sawn nasa a, hei hian science lamah kan rilru kan pe nasa a, kan naupangte pawhin ṭhahnem an ngai hle tih a tilang," a ti.
JH Zoremthanga chuan, "Zirtirtute'n an naupangte an zirtirnaah HOTS question-te chhang thei turin hma an sawnpui ve zel niin kan hria. Competition a nasat ve zel avangin zirlaite leh nu leh pate pawhin ṭan an la a, chuvang chuan result hian hma a sawn niin a lang," a ti a; HOTS zawhna telh tam telh telh a nih thu leh zirlaite'n hma an sawn phaha a lan thu a sawi.
School Education minister Dr Vanlalthlana kaihhruaina hnuaiah Education department-in hma a sawn mek tih sawiin JH Zoremthanga chuan, "Tluang taka exam kan zo thei leh ruahman lâwk anga result kan chhuah theih chhan ber chu zirtirtute inpekna leh ṭhahnemngaihna vang a ni," a ti a; Education department-a thawkte an ṭanrual thu te, Police leh Health department pawhin an mawhphurhnate ṭha taka an hlen thute a sawi bawk.
MBSE CHAIRMAN TARLAN ṬHENKHAT
* Exam centre 100-ah sikul 305 aṭangin zirlai 12,105-in exam an hmachhawn.
* Arts zirna sikul 207 aṭangin zirlai 8,658, science zirna sikul 69 aṭangin zirlai 2,798 leh commerce zirna sikul 29 aṭangin zirlai 649 an exam.
* Zawhnate lower order thingking skills (LOTS) aṭangin 50-60% leh application & HOTS aṭangin 40-50% siam a ni.
* Compartment 91 an awm a, admission an tlai loh nan exam buatsaihsak thuai tum a ni.
* Result complaint hun hi result chhuah aṭanga ni sarih chhung hawn a ni ang.
* NEP 2020 zulzuiin zirlai pass zinga subject pakhata exam ṭha leh duh tan compartmental exam rualin improvement exam buatsaih a ni dawn.