Mizo ei leh in chungchang zirho a ni; Thisen sang tam chhan - bai ei nasat vang?

Tribal Research Institute, Aizawl West College leh Pachhunga University College-a History department-te chuan nimin khan Aizawl West College-ah 'Mizo Foodways: Cultural Traditions, Societal Transformations and Political Dimensions Across Time' tih hmangin international seminar an buatsaih a, Art & Culture minister C Lalsawivunga'n a hmanpui.

Mizo ei leh in chungchang zirhonaah hian keynote address sawitu Prof. Sajal Nag, Assam Royal Global University professor chuan ei leh in leh mihring nun inzawm dan a sawi a; Mizo ei leh inte'n Mizote Mizona a tilang tih sawiin, Mizo zinga thisen sang tam chhan pakhat chu bai ei nasat vang niin medical science mithiamte'n an hriat thute a sawi.

C Lalsawivunga chuan, Mizote chu khawtlanga inkungkaih leh inphiar zawm tlat an nih thu sawiin, "He kan hnam ziarâng nghet taka min phuar khawmtu hi a bo hlauh chuan Mizo hnam pawh a thih ve palh mai a hlauhthawnawm. Kan ei rêl dan te, kan eiho dante hmanga kan inpawhna leh inzawmnate hi kan khawtlang leh hnam tan chakna leh nghehna a ni a, chawi nun zel a ṭha a, kan khawtlang leh hnam tipumkhattu leh tichaktu a ni reng dawn a ni," a ti.

Art & Culture Minister chuan, zirhona chuan rah ṭha a chhuah ngei a beisei thu sawiin, Mizoram sorkar pawhin Mizo ṭobul leh hnam nunphungte chhuia zir chiang turin research committee a din mek thu a sawi.

Seminar hawnna inkhawm hi Art & Culture joint director F Lalthanmawia'n a kaihruai a, AWC assistant professor Dr Malsawmdawngliana'n report a pe a, PUC associate professor Dr Rohmingmawii'n thupui sawi hawnna hun a hmang.

Zirhonaah hian Mizo ei leh in chungchanga thuziak hrang hrang 30 chuang zirho tura buatsaih a ni a, vawiinah chhunzawm a ni ang.