MLA-in sorkar sikulte a tlawh

Aizawl West-II bialtu MLA Lalnghinglova Hmar, minister of state chuan nimin khan a bial chhung Kanan, Vaivakawn leh Dawrpui Vengthar-a sorkar sikul pasarih a tlawh a, tunkar hian a bial chhunga sorkar sikulte tlawh chhuah vek a tum.

Lalnghinglova Hmar chuan sorkar sikulte chu mipui nawlpui ban phak leh mi harsa zawkte chhawk zangkhaitu a nih thu sawiin, "Zirtirtute pawh training palchhuak leh thiam zawk an nih avangin sorkar sikul hi mipui nawlpui luh duhna tura kan siam a ngai. Mipui rilruah sorkar sikul rinna tuh turin kan zavaia kan ṭanrual a ngai a ni," a ti.

Aizawl West-II Bialtu MLA-in sikul a tlawhnaah hian zirna hmasawnna atana rawtna awmte sawiho a ni a, sawihona aṭanga rawtna hrang hrang awmte chu tun academic session chhunga bawhzui tura ruahmanna siam a ni.

Lalnghinglova Hmar hi Education department hotute'n ṭawiawmin, local council leh khawtlang hruaitute’n anmahni veng huamchhung ṭheuhah an lo dawng sawng.