Dan phal loh silencer/exhaust tichhia

Lunglei Traffic Police-te chuan two wheeler silencer/exhaust an man 23, decibel 80 pêl leh ri ring tura siam danglamte chu nimin khan roadroller an chîl chhiattir.

Lunglei Police aṭanga thu dawn danin, danin a phal loh silencer/exhaust ri ring hmangtute'n mipui tan harsatna an thlen ṭhin avangin lirthei neitute hnen aṭangin dan ang takin silencer/exhaust-te an man a, court-ah hmalak chhunzawm turin an hlan. Court thuchhuak angin silencer/exhaust-te chu tihchhiat a ni.

Silencer/exhaust chîl chhiatte chu thirchhia anga hralh nghal a ni a; a vaiin kg. 40 niin, kg. khat Rs 15 anga chhûtin Rs 600 hmuh a ni. A hralhna pawisa chu court thu angin sorkarah an chhûng lut nghal.

Lunglei Traffic Police-te'n kum 2024 aṭangin May 2025 thlenga silencer/exhaust an man leh Chief Judicial Magistrate, District Court, Lunglei thuchhuak anga an tihchhiat tawh chu 94 a ni a; tihchhiat tawh hnua hralhna aṭangin Rs 2,168 hmuh a ni.

Lunglei SP J Lalmuankima chuan, dan phal baka silencer/exhaust ring tak tak hmangtute an zawng chhunzawm zel dawn tih a sawi a; Lunglei district chhunga lirtheia zin harsatna tâwkte chu Lunglei Police Station Officer-in-Charge (phone 8974637760) emaw, Traffic police-in-charge (phone 8974637603) emaw hriattir turin mipui a ngen.