HSSLC 2025-a hlawhtlingte lawmpui

Zirlai pawlte chuan thuchhuah siamin, Mizoram Board of School Education (MBSE)-in Higher Secondary School Leaving Certificate (HSSLC) 2025 result nimina an tihchhuahah leh result-ah an lawm thu leh, zirlai hlawhtlingte an lawmpui thu an tarlang.

MZP chuan, result tihchhuah avanga an lawm thu sawiin, "MBSE thawktute thawhrimna leh inpeknaah lawmthu kan sawi. Pass percentage 81.10 a ni a, nikum 2024 khan 78.04% a ni a, hmasawnna nasa takah kan ngai," an ti. Zirlai hlawhtlingte an lawmpui rualin, hlawhtling lote beidawng loa nasa lehzuala zir zel turin an chah a, Compartmental chance neite pawh nasa zawka inbuatsaih chhunzawm turin an chah bawk. MZP hian vawiin hian HSLC 2025-a top 10-a lang Mizo zirlaite chawimawina hun an hmang dawn a ni.

Mizo Students’ Union chuan, HSSLC 2025-a hlawhtlingte lawmpuiin, an kal zelna turah duhsakna an hlan a, hlawhtling lote an tawrhpui a, beidawng lo tur leh hlawhtling ngei tura bei nawn turin an chah a, "Nikum aia kumina pass percentage 3.06-a kan tam chu lawmawm kan tiin, zirtirtute thawhrimna leh inpeknaah lawmthu kan sawi," an ti. MSU chuan HSSLC 2025-a Mizo zirlai ti ṭhate lawmpuina hun an hman dawn thu an sawi bawk.

ZPM Ṭhalai pawhin thuchhuah siamin, zirlai hlawhtlingte an lawmpui a, comparmental chance la neite leh fail-te chu an la hlawhtlin ngei theih nan duhsakna an hlan. "MBSE-in HSSLC 2025 result rang tak a tichhuak hi lawmawm kan tiin, thawktute inpeknaah lawmthu kan sawi. 100% fail school-te sorkarin a ṭul anga en zui tur leh thuam ṭhat an ngaihna laite enfiah turin thuneitute kan ngen a ni," an ti.