India leh Pakistan inkar ṭha lo vangin Civil defence mock drill buatsaih a ni

India leh Pakistan inkar chhe mek avanga Ministry of Home Affairs thuchhuak angin nimin khan Aizawlah civil defence mock drill buatsaih a ni a, zanah 'Black Out' hun hman a ni bawk.

India leh Pakistan hi indo ta se, chhiatna thleng thei a nih avangin MHA chuan May 7, 2025-ah civil defence mock drill nei turin India rama state leh union territory-te a hriattir a; chumi ang chuan nimin chawhma dar 11 khan Aizawl District Disaster Management Authority bultumin Tuikhuahtlang leh Civil Hospital Aizawl-ah mock drill neih a ni.

Mock drill-ah hian ADDMA chairman leh Aizawl DC Lalhriatpuia thupekin chawhma dar 11-ah Aizawl DC pisa aṭangin rálkhèl dár (siren) tihrîk a ni a; India ramin ram pawn lam aṭanga beihna a tawh avanga mitthi leh hliamte chhanchhuah dan tur a taka chan a ni.

Mizoram Home Guard leh Civil Defence, 1st MAP leh 3rd MAP aṭangin mi 10 ṭheuh chhanchhuah hna thawktu team siam a ni a, anni hian All India Radio (Akashvani), Aizawl Station beihnaa hliamte hmun himah an hruai a, ambulance leh kângṭhelh motor hmangin damdawi-inah an tlanpui a ni. Tuikhuahtlanga PHE tuizem lian chu ram dang sipaiin an beih loh nan khuh a ni bawk.

Nimin vek khan National Disaster Response Force chuan awareness programme a buatsaih nghal a, Aizawla sikul 15 aṭangin zirlaite an tel.

Nizan khan Aizawlah 'Black Out' hun hman a ni bawk a; zan dar 6:28-ah Bawrhsap pisa aṭangin rálkhèl dár tihrik a ni a, traffic police-te'n lirthei tlan laite an tiding a, dar 6:30-ah Aizawl khawpui pumpuiah kawlphetha tihtawp niin, minute 5 chhung tihthim a ni. Khawlaia lirthei tlante engine leh headlight-te tihthih a ni a; sorkar ngenna angin veng hrang hrangah chhungkaw tam takin an ina êngte an tithim bawk.