MSME leh Labour changtu Minister-in Khawzawl leh Chawngtlai khua a tlawh

Sorkar laipuia Micro, Small and Medium Enterprises (MSME) leh Labour & Employment enkawltu minister of state Shobha Karandlaje chuan nimin khan Khawzawl district a tlawh a; district hotute chu hna ṭul ngai pawimawh tur leh eirukna leh hlemhletna laka fihlim turin a chah.

Minister hi bawrhsap K Vanlalṭhiana kaihhruaiin sorkar official-te nen an inkawm a; Khawzawl district tan theihtawp chhuah tura chahin, "Hna ṭul ngai pawimawh u la, eirukna leh hlemhletna laka fihlim tlat ang che u," a ti.

Inkawmhonaah hian Khawzawl district hotute'n sorkar department hrang hrang hmalakna leh sorkar laipui scheme an kalpui dante an hrilhfiah a; Shobha Karandlaje chuan, PMEGP, PM Vishwakarma, MGNREGA, PM KISAN, JJM leh a enkawl ministry kaihhnawiha thil chi hrang hrangte zawtin a sawipui a ni.

Union Minister hian Khawzawla Little Flower School tlawhin, zirtirtute leh zirlaite a kâwm a; PMAY-G hnuaia in sakte pawh a tlawh. Chawngtlai khuaa MzSRLM Rurban Centre, Passion Fruit Processing Unit leh anganwadi centre te a tlawh a, Chawngtlai mipui a kâwm bawk.

Shobha Karandlaje hian May 6, Thawhlehni khan Mizoram a rawn thleng a, nimina Khawzawl leh Chawngtlai a tlawh hnuah helicopter-in Aizawl a pan. Aizawla civil defence mock drill a enpui hnuah tlaiah Mizoram chhuahsanin Delhi a pan leh a ni.