India-in Pakistan-a firfiakte hmun a bei

India sipaite chuan Operation Sindoor tih hming vuahin May 7, 2025 zing dar 1:25 khan Pakistan ram chhung leh Pakistan-occupied Kashmir (PoK)-a firfiak pawl hmunte an bei a, mi eng emaw zat an thi.

Pakistan-a firfiak pawl The Resistance Front intite'n April 22, 2025-a Jammu & Kashmir-a Pahalgam an beihnaa mi 26 an kah hlum chhàn lêtna atan India chuan Operation Sindoor tiin Pakistan leh PoK-a firfiak pawlte inkhuarna hmun pakua a bei a; beihpui thlak hun chhung hi minute 25 a ni.

India sipai hotute sawi danin, Operation Sindoor-ah hian Pakistan sipai hmun hrang hrang beih tel a ni lo a, firfiakte inkhuarna chauh beih a ni. An bitum turte uluk taka thlan a ni a, Pakistan sipai hmun kah a ni lo.

India sipaite'n firfiak hmun pakua an beih zinga pali chu Pakistan ram chhunga awm a ni a, a dang panga chu PoK huam chhunga awm a ni.

Nimin zinga Operation Sindoor-ah hian firfiak pawl Jaish-e-Mohammed (JeM) hotu Masood Azhar chuan a chhungte mi 10 bakah, a thawhpui hnaivai tak mi pali an thih thu a sawi.