KHAWTHLIR

Thisen pe

Central Higher Secondary School NSS Unit chuan nimin khan an sikulah thisen pek runpui an huaihawt a; Civil Hospital, Aizawl tan thisen unit 41 an pe a, petute mipa 28 leh hmeichhia 13 an ni.

Photo copier pe

Minister K Sapdanga chuan a bial Aizawl North-III chhunga Edenthar Primary School hnenah photo copy (xerox) khawl a pe a, a aiawhin bialtu corporator H Lalremtluanga'n May 6, Thawhlehni khan sikul thuneitute hnenah a hlan. Minister chuan Edenthar P/S-in zirlai 270 chuang an nei a, a theih ang anga tuamhlâwm an ṭul avangin photo copy khawl a pe tih a sawi.

SDO (Sadar) ruat

Khawzawl district bawrhsap K Vanlalṭhiana chuan hriattirna tichhuakin, sorkarin ruang phurh man a peksakna turah verification leh signature pe turin Khawzawl DC pisaa SDO (Sadar) ruat a nih thu a tarlang. Khawlzawlah District Social Welfare Officer a la loh avangin Social Welfare, Tribal Affairs, Women & Child Development department thuchhuak angin hriattirna chhuah a ni.

AI chungchang zirho

Serchhip district-a sorkar hnathawk te, khawtlang leh pawl hruaitute pualin nimin han DC Pisapui Hall-ah artificial intelligence (AI) hman dan zirhona buatsaih a ni a, bawrhsap Paul L Khuma'n hmanpui. Lushai Technologies and Consulting chief executive officer Lawmna Kima leh AI/ML vice president Robert Lalramhluna ten AI chungchang an zirtir a ni.

CM leh CRPF hotu

Chief minister Lalduhoma chuan May 6, hawhlehni khan a pisaah Central Reserve Police Force (CRPF) NE Zone additional director Raja Srivastava a kâwm a, Mizorama CRPF hnathawh a sawipui. CM chuan, Mizoramah CRPF-te'n ram venhimna leh mipui tana hna ṭha tak tak an thawh ṭhin avangin a lawm thu a sawi a, theihtawp chhuahpui zel turin a sáwm. Raja Srivastava pawhin, ram venhimna leh dan bawhchhiatna donaah Mizoram sorkar thawhpui tura an inpeih reng thu a sawi bawk.